ADYM.KZ / Шымкент қаласындағы Абай саябағы аумағында орналасқан «Мәңгілік алау» мемориалдық кешенінде азаматтарды әскери қызметке шығарып салу рәсімі өтті. Іс-шараны Шымкент қаласының әкімдігі мен қалалық Қорғаныс істері жөніндегі департаменті бірлесіп ұйымдастырды.
Салтанатты жиынға Шымкент қаласы әкімінің бірінші орынбасары Айдын Кәрімов, Шымкент қаласы Қарулы Күштері ардагерлер кеңесінің төрағасы, отставкадағы полковник Серікбай Онбаев және «Жастар ресурстық орталығы» КММ-нің басшысы Жансерік Жұман қатысты.
Жиынның негізгі мақсаты – әскери қызметке аттанатын жас азаматтарға қолдау білдіріп, олардың бойындағы отансүйгіштік сезімді нығайту және Отан алдындағы азаматтық борыштың маңызын дәріптеу. Салтанатты рәсім барысында жас сарбаздарға ақ тілектер айтылып, ел тыныштығы мен қауіпсіздігін қорғау жолында абыройлы қызмет етуге шақырылды.
Қатысушылар әскери қызметтің ел қорғанысын қамтамасыз етудегі рөліне тоқталып, сарбаздарға жүктелетін жауапкершіліктің жоғары екенін атап өтті. Әскер қатарына қосылу – әрбір азамат үшін тәртіпке үйреніп, төзімділік пен табандылықты қалыптастыратын, ұжымдық жауапкершілік пен өзара қолдаудың мәнін ұғындыратын маңызды өмірлік кезең.
Әскери борышын өтеуге аттанған жастарға әскери тәртіпті сақтап, берілген тапсырмаларды жауапкершілікпен орындау, командирлердің талаптарын орындап, жолдастарына қолдау көрсету жөнінде тілектер білдірілді. Сонымен қатар туған жердің тыныштығы мен халықтың қауіпсіздігін қорғау – үлкен сенім мен зор жауапкершілікті талап ететін міндет екені айтылды.
Отанға қызмет ету – елге деген сүйіспеншіліктің және азаматтық жауапкершіліктің көрінісі. Әскерде жинақталған тәжірибе жас азаматтардың тұлғалық қалыптасуына, тәртіп пен ұйымшылдықты меңгеруіне ықпал етеді.
Салтанатты рәсім соңында жас сарбаздарға әскери қызметтерінің сәтті өтуіне, Отан алдындағы борыштарын абыроймен атқарып, елге аман-есен оралуларына тілектестік білдірілді.
