ADYM.KZ / Қазақстан мен Кувейт цифрлық трансформация, электрондық үкімет және жасанды интеллект салаларындағы өзара ынтымақтастықты нығайтуға ниетті.
Бұл мәселе Қазақстанның Кувейттегі елшісі Ержан Елекеевтің Кувейттің Ақпараттық технологиялар жөніндегі орталық агенттігінің (CAIT) Бас директорының міндетін атқарушы Наджат Хусейн Ибрахиммен кездесуінде талқыланды.
Қазақстанның Сыртқы істер министрлігі таратқан мәліметке сәйкес, кездесуде қазақстандық тарап елде жүзеге асырылып жатқан цифрлық реформалар мен мемлекеттік қызметтерді цифрландыру бағытындағы жетістіктерді таныстырды.
Елші Ержан Елекеев Жасанды интеллект және цифрлық даму министрлігінің құрылуы, сондай-ақ мемлекеттік қызметтердің заманауи цифрлық экожүйесін қалыптастыру бойынша атқарылып жатқан жұмыстар туралы айтты.
Кездесу барысында Қазақстанның БҰҰ-ның Электрондық үкіметті дамыту индексінде 193 елдің ішінде 24-орында тұрғаны және онлайн мемлекеттік қызметтерді дамыту бойынша әлемдегі жетекші мемлекеттердің бірі екені атап өтілді.
Сондай-ақ Мемлекет басшысы Қасым-Жомарт Тоқаевтың бастамасымен 2026 жылдың Цифрландыру және жасанды интеллект жылы болып жарияланғаны сөз болды. Осыған байланысты елімізде жасанды интеллект технологияларын дамыту, цифрлық инфрақұрылымды жетілдіру және IT-мамандар даярлау бағытында кешенді жұмыстар жүргізіліп жатқаны айтылды.
Қазақстан тарапы азаматтар мен бизнеске арналған мыңнан астам мемлекеттік қызметті электронды форматта ұсынатын ұлттық электрондық үкімет жүйесінің мүмкіндіктерін де таныстырды.
Өз кезегінде Кувейт өкілдері мемлекеттік басқаруды цифрландыру және электрондық қызметтерді дамыту саласындағы Қазақстан тәжірибесіне жоғары қызығушылық білдіріп, еліміздің жетістіктеріне оң баға берді.
Кездесу қорытындысында тараптар екі елдің салалық ведомстволары арасында онлайн-кездесулер ұйымдастыруға, тәжірибе алмасу және практикалық ынтымақтастықты дамыту мақсатында өзара сапарларды пысықтауға келісті.
Айта кетейік, CAIT Кувейттің мемлекеттік секторындағы цифрлық трансформацияны үйлестіретін, электрондық үкіметті дамыту және ұлттық цифрлық стратегияны іске асыруға жауапты негізгі мемлекеттік орган болып саналады.
