ADYM.KZ / Венгрия астанасы Будапешт қаласында қазіргі бессайыс (модерн пентатлон) бойынша Әлем кубогының кезекті кезеңі басталды. Әлемнің 40-тан астам елінен ең мықты спортшылар жиналған бұл беделді халықаралық турнирде Қазақстан ұлттық құрамасы да ел намысын қорғауда. Бұл туралы ҚР Ұлттық олимпиадалық комитеті (ҰОК) хабарлады.
Биылғы маусымның үшінші кезеңі Будапешттегі зәулім «Puskás Arena-ның» іргесінде орналасқан «BOK Sports Centre» спорт кешенінде өтіп жатыр. Қазақстан құрамасы сапында жарыс жолына ерлер бойынша Кирилл Стадник, Лев Чувашов, Темірлан Әбдірайымов, Константин Сычев, әйелдерден Полина Андреева, Диана Щедрова шықты.
Турнирдің шымылдығы дәстүрлі түрде әйелдер арасындағы іріктеу кезеңімен ашылды. Болашақ Олимпиада ойындары мен әлемдік деңгейдегі рейтингтік ұпайлар сарапқа салынған сында бәсекелестік өте жоғары болды.
Өкінішке қарай, бұл жолы отандық қыздарымыздың бағы жанбады. Полина Андреева мен Диана Щедрова іріктеу кезеңінде барын салғанымен, ұпайлар қорытындысы бойынша жартылай финалдық кезеңге өтетін үздіктер қатарынан көріне алмады. Десе де, халықаралық дода спортшыларымызға үлкен тәжірибе мектебі болғаны сөзсіз.
Әйелдер бәсекесі аяқталғаннан кейін, ендігі кезекте жарыс жолына ерлер құрамасы шығады. Алда оларды да тартысты іріктеу кезеңі күтіп тұр. Қазақстандық төрт спортшы жартылай финалға, кейіннен ақтық сынға жолдама алу үшін барын салады.
Анықтама: Қазіргі бессайыс бағдарламасы спортшының жан-жақтылығын сынайтын бес түрлі тармақтан тұрады. Олар: семсерлесу (фехтование), кедергілерден өту (2026 жылғы ережеге сай атпен кедергілерден секірудің орнына енгізілген Obstacle форматы), жүзу (100 метрге еркін стильде) және оқ ату мен жүгіруді біріктіретін лазер-ран (Laser Run) дисциплинасы.
Жанкүйерлер мен бапкерлер штабы Кирилл Стадник бастаған ерлер құрамасынан жоғары нәтижелер күтеді. Жарыстың жартылай финалдық және финалдық бәсекелері Халықаралық қазіргі бессайыс одағының (UIPM) ресми ресурстарында тікелей эфирде көрсетіледі.
