ADYM.KZ / Шымкент гарнизонының әскери прокуратурасы құны 1 миллиард теңгеден асатын жер учаскесін мемлекет меншігіне қайтарды.
Қадағалау шаралары барысында Ұлттық ұланның әскери бөлімдерінің біріне тиесілі жалпы аумағы 87 гектардан асатын жер учаскесінің 1999 жылы заңсыз түрде жеке меншік құрылымдардың пайдасына берілгені анықталған.
Прокуратура мәліметінше, кейін бұл жер бірнеше рет үшінші тұлғаларға қайта сатылған.
Бас әскери прокуратураның хабарлауынша, әскери мүліктің сақталуы мен мақсатты пайдаланылуын қамтамасыз ету бағытында тұрақты тексерулер жүргізіліп келеді.
«Тексеру барысында қорғаныс мақсатындағы жер учаскесінің заңсыз иеліктен шығарылғаны анықталды. Гарнизон прокуратурасы әскери бөліммен бірлесіп, сот тәртібімен сатып алу-сату шарттарын жарамсыз деп тану бойынша шаралар қабылдады. Нәтижесінде стратегиялық маңызы бар жер мемлекет меншігіне қайтарылды», – делінген ведомство хабарламасында.
Сот шешімімен барлық мәмілелер жарамсыз деп танылып, аталған жер учаскесі әскери ведомствоның балансына өткізілді.
Ведомство өкілдері әскери мүлікті қорғау және заңсыз шығарылған активтерді мемлекетке қайтару жұмыстары алдағы уақытта да жалғасатынын мәлімдеді.
Айта кетейік, бұған дейін Маңғыстау облысында құны 870 млн теңге болатын 50 гектар жер учаскесінің де мемлекет меншігіне қайтарылғаны хабарланған болатын.
