ADYM.KZ / Қазақстанда авторлар мен құқық иеленушілерге өз туындыларының пайдаланылуын және тиесілі сыйақы көлемін бақылауға мүмкіндік беретін мобильді қосымша іске қосылады.
Бұл туралы Орталық коммуникациялар қызметінде өткен брифингте Қазақстан Республикасы Әділет вице-министрі Ботагөз Жақселекова мәлімдеді.
Оның айтуынша, жаңа мобильді қосымша зияткерлік меншік саласындағы Бірыңғай цифрлық платформа аясында әзірленіп жатыр.
Қосымша арқылы авторлар мен құқық иеленушілер өз туындыларының қайда, қашан және қанша рет пайдаланылғаны туралы ақпарат ала алады. Сондай-ақ пайдаланудан қанша қаражат түскенін және авторға қандай көлемде сыйақы тиесілі екенін бақылауға мүмкіндік беріледі.
Вице-министрдің айтуынша, барлық қажетті мәлімет ұялы телефон арқылы қолжетімді болады.
— Автор мен құқық иеленуші өз туындысының қайда, қашан және қанша рет пайдаланылғанын, одан қанша қаражат жиналғанын және өзіне қанша сыйақы тиесілі екенін көре алады, — деді Ботагөз Жақселекова.
Бірыңғай цифрлық платформа авторлар мен құқық иеленушілерді, олардың құқықтарын басқаратын ұйымдарды және туындыларды пайдаланушыларды бір жүйеге біріктіреді.
Платформа арқылы тараптар шарт жасасып, туындылардың пайдаланылуын есепке алып, тиісті есептілікті жүргізе алады. Сонымен қатар авторларға тиесілі сыйақыны есептеу, бөлу және төлеу үдерістері де цифрлық форматта жүзеге асырылады.
Жаңа жүйе авторлық құқық саласындағы ашықтықты арттырып, авторлар мен құқық иеленушілерге өз шығармаларының пайдаланылуын бақылауды жеңілдетуге бағытталған.
