ADYM.KZ / Қазақстан Республикасы Мәдениет және ақпарат министрі Аида Балаева әлеуметтік желідегі парақшасында «Қала хикаялары» атты жаңа республикалық әдеби байқаудың басталғанын жариялады.
Проза жанрына арналған шығармашылық дода қазіргі Қазақстан қалаларының тыныс-тіршілігін көркем әдебиет арқылы бейнелейтін жаңа авторларды анықтап, қолдауға бағытталған. Байқау аясында қатысушыларға қала мәдениеті, адам тағдыры, қоғамдағы өзгерістер, ұлттық болмыс пен заманауи құндылықтардың сабақтастығы тақырыптарын қамтитын көркем туындылар ұсыну ұсынылады.
Байқауға Қазақстан Республикасының азаматтары қатыса алады. Қабылданатын жұмыстардың негізгі талабы – көлемі кемінде 10 авторлық баспа табақ болатын, бұрын еш жерде жарияланбаған роман болуы тиіс. Бір автор тек бір ғана шығармасын ұсына алады.
Жеңімпаздарды белгілі жазушылар мен қоғам қайраткерлерінен құралған қазылар алқасы анықтайды. Қорытынды шешім ашық дауыс беру арқылы қабылданады.
Байқау нәтижесінде үздік шығармалардың авторлары дипломдармен және ақшалай сыйлықтармен марапатталады. Сонымен қатар жүлдегер атанған туындылар 15 мың дана таралыммен жарық көріп, еліміздің кітапханаларына таратылады.
Байқаудың жүлде қоры төмендегідей:
– Бас жүлде – 100 мың АҚШ доллары;
– I орын – 75 мың АҚШ доллары;
– II орын – 50 мың АҚШ доллары;
– III орын – 30 мың АҚШ доллары.
Конкурсқа жұмыстар 2026 жылғы қыркүйек пен желтоқсан айлары аралығында қабылданады.
Құжаттарды Астана қаласы, Мәңгілік Ел даңғылы, 8, 14-кіреберіс мекенжайында орналасқан Қазақстан Республикасы Мәдениет және ақпарат министрлігіне тапсыру қажет.
Байқауға қатысу шарттары бойынша қосымша ақпаратты 8 (7172) 74-04-07 және 8 (7172) 74-04-08 телефон нөмірлері арқылы алуға болады.
