Президент Қасым-Жомарт Тоқаев медицина қызметкерлері күніне арналған салтанатты іс-шарада әлеуметтік саясат, тегін медициналық көмек және жас аналарды қолдау мәселелеріне тоқталды, деп хабарлайды Adym.kz ақпараттық сайты Ақордаға сілтеме жасап.
Мемлекет басшысының айтуынша, жаңа Конституцияға сәйкес Қазақстан әлеуметтік мемлекет болып табылады. Сондықтан әлеуметтік саладағы барлық міндеттемелерді орындау биліктің барлық тармақтары үшін конституциялық міндет саналады.
«Бұл міндет табысты жүзеге асырылып жатыр. Өткен жылы республикалық бюджеттен әлеуметтік қажеттіліктерге 9 триллион теңгеден астам қаржы бөлінді. Тегін медициналық көмектің кепілдендірілген көлемі бағдарламасын іске асыру да – мемлекеттің конституциялық міндеті», – деді Президент.
Қасым-Жомарт Тоқаев тегін медициналық қызметтерді қамтитын бұл бағдарламаны еліміздің маңызды жетістіктерінің бірі ретінде бағалады. Оның пікірінше, Қазақстандағы әлеуметтік қолдау тетіктері, әсіресе жас аналарға берілетін жеңілдіктер көптеген дамыған елдерде кездеспейді.
Президенттің айтуынша, бала дүниеге келгеннен кейін әйелдердің жұмыс орны сақталады, олар үш жылға дейін декреттік демалысқа шығып, тиісті әлеуметтік төлемдер алады.
«Мен Швейцарияда жұмыс істеген кезде бұл мәселені арнайы зерттедім. Швейцарияда және басқа да Батыс елдерінде мұндай жүйе жоқ», – деді Мемлекет басшысы.
Сонымен қатар Президент Қазақстанның медицина саласында инновацияларды енгізу, емдеу стандарттарын жетілдіру және қызмет сапасын арттыру бағытында жүйелі жұмыс жүргізіп жатқанын айтты. Оның сөзінше, бұл үрдістер еліміздің медициналық туризмнің өңірлік орталығы ретінде танылуына ықпал етуде.
Іс-шара барысында Мемлекет басшысы медицина қызметкерлерін кәсіби мерекесімен құттықтап, сала мамандарына қолдау көрсету мәселелеріне де тоқталды. Биыл медицина қызметкерлерінің жалақысын арттыру үшін 33 миллиард теңге бөлінгені айтылды.
Сондай-ақ Президент медицина қызметкерлеріне күш көрсеткен азаматтарды қылмыстық жауапкершілікке тарту қажеттігін атап өтіп, қоғамдық орындардағы әдеп нормаларын сақтау мәселесіне назар аударды.
Айта кетейік, Қазақстанда маусым айының әр үшінші жексенбісі Медицина қызметкерлері күні ретінде атап өтіледі. Бұл мереке 1998 жылғы Президент Жарлығымен бекітілген. Сонымен қатар Астана медицина университетіне көрнекті ғалым Төрегелді Шармановтың есімі берілетіні белгілі болды.
