ADYM.KZ / Лос-Анджелесте өтетін 2028 жылғы Олимпиада және Паралимпиада ойындарының ұйымдастыру комитеті волонтерлік бағдарламаға қатысу үшін өтінім қабылдаудың басталғанын жариялады.
Қазақстан Ұлттық олимпиадалық комитетінің мәліметінше, үміткерлерді тіркеу 2026 жылдың 14 шілдесінде басталады. Бұл күн Олимпиада ойындарының ашылу салтанатына тура екі жыл қалатын мерзіммен сәйкес келеді.
Ұйымдастырушылардың жоспарына сәйкес, Олимпиада және Паралимпиада ойындары кезінде волонтерлік корпус құрамында шамамен 60 мың адам қызмет атқарады. Олар әлемдегі ең ірі көпсалалы спорттық жарысты ұйымдастыруға қолдау көрсетеді.
Волонтерлер спортшылар мен қонақтарды қарсы алып, оларға бағыт-бағдар береді, спорт нысандарындағы көрермендерге көмектеседі, навигациялық қызмет көрсетеді. Сондай-ақ медициналық сүйемелдеу, аударма және басқа да қызмет түрлеріне тартылады.
Еріктілердің басым бөлігі Үлкен Лос-Анджелес аумағында жұмыс істейді. Сонымен қатар Олимпиада бағдарламасындағы жекелеген жарыстар өтетін АҚШ-тың өзге қалаларындағы спорт нысандарына да волонтерлер қабылданады.
Бағдарлама екі кезеңнен тұрады. Бірінші кезеңде қатысушылар Олимпиадаға дайындық аясында өткізілетін қоғамдық, спорттық және экологиялық жобаларға қатысады. Екінші кезеңде олар Олимпиада және Паралимпиада ойындары кезінде тікелей қызмет атқарады.
Ұйымдастырушылардың айтуынша, дайындық кезеңіндегі шараларға қатысу үміткерлерге тәжірибе жинақтауға, ірі халықаралық жарыстарды ұйымдастыру процесімен танысуға және Олимпиада қозғалысының бір бөлігіне ертерек айналуға мүмкіндік береді.
Бағдарламаға қатысу үшін үміткерлер ойындар басталған кезде кемінде 18 жаста болуы және ағылшын тілін меңгеруі қажет. Сонымен қатар әрбір волонтер Олимпиада немесе Паралимпиада барысында ұзақтығы шамамен сегіз сағат болатын кемінде он ауысымда жұмыс істеуге міндетті.
Айта кетейік, Лос-Анджелестегі Олимпиада ойындары 2028 жылдың 14-30 шілде аралығында, ал Паралимпиада ойындары 15-27 тамыз аралығында өтеді.
