ADYM.KZ / Астанада тұрғындарды бұқаралық спортқа тартуға бағытталған AULAFIT әлеуметтік жобасының жаңа маусымы ресми түрде басталды. Жобаның ашылу салтанаты «Құлагер» тұрғын үй кешенінің ауласында өтті.
Іс-шара барысында жазғы маусымда жұмыс істейтін жаттықтырушылар таныстырылып, жобаның негізгі бағыттары мен алдағы жоспарлары туралы ақпарат берілді.
Астана қаласы Дене шынықтыру және спорт басқармасы басшысының орынбасары Азамат Ағзамовтың айтуынша, AULAFIT жобасы алты жылдан бері елорда тұрғындары арасында салауатты өмір салтын насихаттап, бұқаралық спортты дамытуға үлес қосып келеді.
– Осы уақыт ішінде мыңдаған астаналық тұрақты түрде жаттығуларға қатысып, спортты күнделікті өмірінің ажырамас бөлігіне айналдырды. Мұндай бастамалар тұрғындардың денсаулығын нығайтып қана қоймай, белсенді қоғам қалыптастыруға ықпал етеді. Сондықтан бұқаралық спортты дамыту бағытындағы жұмыстар алдағы уақытта да жалғасады, – деді Азамат Ағзамов.
Басқарма өкілінің мәліметінше, биыл жоба қаланың алты ауданындағы 30 аулада жүзеге асырылады. Жаттығулар аптасына алты күн өткізіліп, әртүрлі жас санаттарына арналған бағдарламаларды қамтиды.
Жоба жетекшісі Айтжан Мусиннің айтуынша, AULAFIT-тің басты артықшылығы – оның қолжетімділігі.
– Жаттығуларға үш жастан бастап егде жастағы тұрғындарға дейін қатыса алады. Барлық сабақтар білікті мамандардың жетекшілігімен өтеді және қажетті спорттық құрал-жабдықтармен қамтамасыз етіледі. Ең бастысы – қатысу толықтай тегін, – деді ол.
AULAFIT жобасы маусымнан қыркүйек айына дейін жалғасады. Бағдарлама аясында жалпы дене дайындығы жаттығулары, фитнес элементтері және белсенді қимыл-қозғалыс ойындары ұйымдастырылады.
