ADYM.KZ / Қазақстанда жоғары оқу орындарына білім беру гранттарын тағайындау конкурсына құжат қабылдау 13-20 шілде аралығында жүргізіледі.
Ғылым және жоғары білім министрлігінің мәліметінше, талапкерлер құжаттарын жоғары оқу орындарының қабылдау комиссиялары арқылы офлайн форматта, виртуалды қабылдау комиссиялары арқылы онлайн түрде, сондай-ақ eGov порталы арқылы тапсыра алады.
Грант конкурсына қатысу үшін талапкерлерден жеке куәлік, ҰБТ сертификаты, көлемі 3х4 фотосурет және орта білім туралы аттестат талап етіледі. Ал колледж түлектері дипломын ұсынуы қажет.
Жеңілдетілген санат бойынша конкурсқа қатысатын азаматтар өз мәртебесін растайтын құжаттарды қоса тапсыруы тиіс.
Министрліктің хабарлауынша, B167 «Ұшу аппараттарын және қозғалтқыштарды ұшырып пайдалану» білім беру бағдарламасына түсушілер үшін дәрігерлік ұшу-сараптамалық комиссиясының медициналық куәландыру қорытындысы міндетті түрде талап етіледі.
Ведомство өкілдері талапкерлерге құжат қабылдау және конкурсқа қатысу тәртібі бойынша қосымша ақпарат алу үшін жоғары оқу орындарының қабылдау комиссияларына жүгінуге кеңес береді.
