ADYM.KZ / Мүгедектігі бар азаматтардың ғимараттар мен қызметтерге кедергісіз қол жеткізуіне жағдай жасамаған кәсіпкерлер мен мекеме басшыларына ірі көлемде айыппұл салынуы мүмкін.
Бұл туралы ҚР Еңбек және халықты әлеуметтік қорғау министрлігі Әлеуметтік қорғау саласын реттеу және бақылау комитетінің Алматы қаласы бойынша департаментінің басшысы Мұрат Мұратбеков мәлімдеді.
Оның айтуынша, қолданыстағы заңнамаға сәйкес қолжетімді орта талаптарын орындамаған лауазымды тұлғаларға 50 АЕК, шағын бизнес субъектілеріне 120 АЕК (519 мың теңге), орта бизнеске 200 АЕК (865 мың теңге), ал ірі бизнеске 400 АЕК (1,739 млн теңге) көлемінде айыппұл салынады.
Департамент басшысы кәсіпкерлерге айыппұл төлеуден гөрі нысандарды мүгедектігі бар адамдардың қажеттілігіне сай бейімдеуге қаржы жұмсаған тиімді екенін атап өтті. Себебі айыппұл салынғаннан кейін де заң талаптарын орындау міндеті сақталады.
Сондай-ақ талаптарды қайталап бұзған жағдайда жауапкершілік күшейеді. Бұл ретте ірі бизнес субъектілеріне 600 АЕК немесе 2,595 млн теңгеге дейін айыппұл салынуы мүмкін.
Мұрат Мұратбеков өткен жылы жүргізілген тексерулер нәтижесінде бірқатар банкке әкімшілік шаралар қолданылғанын айтып, барлық ұйымдарды қолжетімді орта талаптарын сақтауға шақырды.
