ASTANA — ADYM.KZ / «Әділет» партиясы әлеуметтік желілерде партияның атауы мен рәміздерін заңсыз пайдаланып жүрген жалған аккаунттар мен парақшалар анықталғанын мәлімдеді.
Партияның баспасөз қызметінің хабарлауынша, аталған ресурстар өздерін партияның ресми өкілдігі ретінде таныстырып, партиялық билеттер беру, мүшелерді тіркеу және партия қызметіне қатысты жалған ақпарат тарату әрекеттерімен айналысқан.
«Әділет» партиясы бұл аккаунттардың ұйымға ешқандай қатысы жоқ екенін атап өтіп, олар арқылы жарияланған мәліметтердің шындыққа сәйкес келмейтінін жеткізді.
Партия азаматтарды тек ресми ақпарат көздеріне сенуге шақырды. Ресми байланыс арналары ретінде Instagram-дағы @adilet_partiyasy парақшасы, Telegram-дағы t.me/adilet_partiyasy арнасы және партияның ресми сайты көрсетілген.
Сондай-ақ партия өкілдері атау мен рәміздерді заңсыз пайдалану, жалған ақпарат тарату және азаматтарды жаңылыстыру фактілері үшін Қазақстан заңнамасында жауапкершілік қарастырылғанын ескертті. Анықталған жағдайлар бойынша материалдар тиісті шара қабылдау үшін құқық қорғау органдарына жолданған.
«Әділет» партиясы азаматтарды жеке деректерін бейтаныс тұлғаларға бермеуге және тек ресми байланыс арналары арқылы ақпарат алуға шақырды.
Еске салайық, бұған дейін «Әділет» партиясының съезінде партияның Amanat партиясына қосылуы туралы шешім мақұлданған болатын.
