ADYM.KZ / Қазақстанда салықтық әкімшілендіруді цифрландыру аясында Интеграцияланған салықтық әкімшілендіру жүйесі (ИСНА) толық іске қосылды. Бұл туралы Қаржы вице-министрі Әсет Тұрысов мәлімдеді.
Оның айтуынша, жаңа жүйе бұрын жеке жұмыс істеген жеті ақпараттық платформаны біріктіріп, ескірген технологиялық шешімдердің орнын басты.
«Қазіргі уақытта ИСНА толық іске қосылып, тұрақты жұмыс істеп тұр», – деді вице-министр.
Жаңа жүйенің енгізілуі мемлекеттік қызметтерді көрсету мен өңдеу мерзімдерін айтарлықтай қысқартуға мүмкіндік берді. Атап айтқанда, операциялық күнді жабу уақыты 18 сағаттан 3 сағатқа дейін қысқарса, онлайн төлемдерді өңдеу мерзімі 15 минуттан 1 минутқа дейін азайған. Сондай-ақ құжат айналымының уақыты 1 сағаттан 1 минутқа дейін қысқарды.
Бұдан бөлек, жүйе салық төлеушілердің шоттарына қойылған бұғаттарды онлайн режимде алып тастауға мүмкіндік береді.
ИСНА құрамында «Реабилитация және банкроттық» модулі де іске қосылған. Оның көмегімен прокуратура, сот және банк органдары арасындағы рәсімдер толық цифрландырылып, құжаттарды қарау мерзімі 10 күннен 1 күнге дейін қысқарған.
Қаржы министрлігінің мәліметінше, жаңа Салық кодексі аясында жүйені одан әрі жетілдіру және дамыту жұмыстары жалғасады.
Айта кетейік, бұған дейін салық жүйесіндегі 14 ақпараттық платформа бес негізгі жүйеге біріктірілген болатын.
