ADYM.KZ / Қазақстан жасанды интеллект инфрақұрылымын дамытуға бағытталған жалпы құны 10 млрд доллар болатын стратегиялық келісімдерге қол қойды. Жоба америкалық Firebird компаниясы мен NVIDIA технологиялық серіктестігінің қатысуымен жүзеге асырылады.
Премьер-министр Олжас Бектенов NVIDIA вице-президенті Рев Лебаредян және Firebird компаниясының негізін қалаушыларымен кездесіп, ұлттық жасанды интеллект инфрақұрылымын дамыту мәселелерін талқылады. Кездесуге цифрлық даму министрі Жаслан Мәдиев, «Қазақтелеком» басқарма төрағасы Бағдат Мусин және АҚШ-тың Қазақстандағы елшісі Джули Стаффт қатысты.
Жобаның негізгі бөлігі Екібастұзда жүзеге асырылып жатқан «Деректерді өңдеу орталықтары алқабы» бастамасымен байланысты. Мұнда жоғары өнімді есептеу қуаттары мен заманауи деректер орталықтарын орналастыру көзделген.
Үкіметтің мәліметінше, инвестиция есебінен NVIDIA-ның соңғы буындағы чиптері негізінде 100 мың GPU-дан тұратын ауқымды есептеу кластері құрылады. Сарапшылардың бағалауынша, жоба іске қосылғаннан кейін жыл сайын кемінде 3 млрд доллар көлемінде экспорттық табыс әкелуі мүмкін.
Firebird бас директоры Размик Овакимян Қазақстанның технологиялық әлеуеті жоғары екенін атап өтіп, жобаны 2027 жылы іске қосу елді жасанды интеллект инфрақұрылымы дамыған жетекші мемлекеттердің қатарына шығаруға мүмкіндік беретінін айтты.
Кездесу қорытындысында Жасанды интеллект және цифрлық даму министрлігі мен Firebird арасында стратегиялық ынтымақтастық туралы келісімге, сондай-ақ «ДӨО алқабы» жобасын іске асыруға қатысты техникалық және ұйымдастырушылық шарттарды айқындайтын құжаттарға қол қойылды.
Үкіметтің пікірінше, бұл бастама Қазақстанның Орталық Еуразиядағы ірі цифрлық хаб ретіндегі позициясын күшейтіп, жаңа жұмыс орындарын ашуға, технологиялық компанияларды тартуға және жасанды интеллект экожүйесін дамытуға серпін береді.
