ADYM.KZ / АҚШ-тың Нью-Йорк штатындағы Канастота қаласында Халықаралық бокс даңқы залына (IBHOF) жаңа мүшелерді қабылдау рәсімі өтті. Биыл бұл мәртебеге қазақстандық әйгілі боксшы Геннадий Головкин ие болды.
Осылайша Головкин Қазақстан тарихында Халықаралық бокс даңқы залына енгізілген алғашқы спортшы атанды. Ол бұл құрметке алғашқы мүмкіндіктің өзінде қол жеткізді, бұл кәсіби бокстағы ең жоғары марапаттардың бірі саналады.
Енді қазақстандық боксшының есімі бокс аңыздары – Мұхаммед Әли, Майк Тайсон, Флойд Мейвезер және Мэнни Пакьяо сынды спортшылармен қатар аталады.
«Класс-2026» тізіміне Геннадий Головкинмен бірге америкалық Антонио Тарвер, британдық Найджел Бенн, жапониялық Наоко Фудзиока және мексикалық Джеки Нава енгізілді.
Головкин әуесқой бокста 350 жекпе-жектің 345-інде жеңіске жетіп, Қазақстан құрамасының көшбасшыларының бірі болды. Ал кәсіби рингте 45 жекпе-жек өткізіп, 42 рет жеңіске жетті. Оның 37 жеңісі нокаутпен аяқталған.
Спорттық мансабында ол WBA, WBC, IBF және IBO тұжырымдары бойынша әлем чемпионы атанып, The Ring журналының чемпиондық белбеуін иеленді. Сонымен қатар орта салмақтағы ең ұзақ нокауттық сериялардың бірін тіркеп, әлем чемпионы титулдарын 21 рет сәтті қорғады.
Қазіргі уақытта Геннадий Головкин Қазақстан Ұлттық Олимпиадалық комитетінің президенті әрі World Boxing ұйымының басшысы қызметтерін атқарады. Ол халықаралық спорт федерациясын басқарған алғашқы қазақстандық ретінде де тарихқа енді.
Айта кетейік, Халықаралық бокс даңқы залы 1989 жылы құрылған. Бүгінде оның құрамында әлемдік бокс тарихында өшпес із қалдырған 300-ден астам тұлға бар.
