Қазақстанда кино саласы жаңа технологияларға бет бұрып келеді. Биыл елордада алғаш рет Astana AI Film Festival халықаралық фестивалі өтеді, деп хабарлайды Adym.kz ақпараттық сайты. Ерекшелігі фестивальге жасанды интеллект көмегімен түсірілген фильмдер қатысады.
Мамандардың пікірінше, AI технологиялары кино өндірісінің форматын түбегейлі өзгерте бастаған. Қазір әлемде нейрожелі арқылы сценарий жазу, анимация жасау және визуалды эффект әзірлеу қарқынды дамып келеді. Қазақстан да бұл үрдістен шет қалмауға тырысуда.
Президент Қасым-Жомарт Тоқаев Astana AI Film Festival туралы пікірінде жасанды интеллект шығармашылық индустрияның табиғатын өзгертіп жатқанын атап өткен. Сарапшылардың айтуынша, алдағы жылдары AI технологиялары тәуелсіз кинорежиссерлер үшін жаңа мүмкіндік ашуы мүмкін.
Сонымен қатар қазақстандық кино контентіне қызығушылық артып келеді. Жақында жарияланған зерттеуде 2001-2025 жылдар аралығындағы 100 мыңнан астам қазақстандық кино пікірлері сараланған. Ғалымдар көрермендердің отандық фильмдерге қызығушылығы өскенін айтады.
