ADYM.KZ / 2026 жылдың басынан бері Астана халықаралық әуежайы 3,39 миллионнан астам жолаушыға қызмет көрсетіп, 27 540 рейстің орындалуын қамтамасыз етті.
Әуежай мәліметінше, жолаушылар ағынының өсуіне жаңа халықаралық бағыттардың ашылуы мен әуе қатынастары географиясының кеңеюі әсер еткен. Биыл маршруттық желі Ларнака (Кипр), Ұлан-Батыр (Моңғолия), Гуанчжоу (Қытай), Ереван (Армения) және Даламан (Түркия) бағыттарымен толықты. Нәтижесінде халықаралық рейстер саны 42-ден 47 бағытқа дейін артты.
Қазіргі таңда жолаушылар үшін Қазақстан бойынша 18 ішкі бағыт қолжетімді. Маусым айынан бастап бірқатар ішкі рейстердің жиілігі де көбейтілді. Астана – Қызылорда бағыты бойынша апталық рейстер саны 30-дан 33-ке дейін өсті.
Сондай-ақ 12 маусымнан бастап Астана – Шымкент бағытына қосымша үш рейс енгізіліп, апталық рейстер саны 63-ке жетті. Ал Астана – Алматы бағыты бойынша аптасына 195 рейс орындалады, бұл бұрынғы көрсеткіштен бес рейске артық.
Осының нәтижесінде маусым айынан бастап елорда әуежайынан орындалатын ішкі тұрақты рейстер саны 30 пайызға артып, аптасына 752 рейстен 984 рейске дейін көбейді.
Жазғы маусымда Балқаш, Үржар және Үшарал бағыттары бойынша әуе қатынасы қайта жанданды. Бұл ішкі туризмді дамытуға және өңірлер арасындағы көлік қолжетімділігін арттыруға мүмкіндік береді.
Әуежай инфрақұрылымды жаңғырту жұмыстарын да жалғастырып жатыр. Қазіргі уақытта Т2 терминалын жаңарту жобасы жүзеге асырылуда. Жоба аясында жолаушыларға қызмет көрсету сапасын арттыру, терминалдың өткізу қабілетін кеңейту және халықаралық стандарттарға сай қолайлы жағдай жасау көзделген.
Бұдан бөлек, биыл мамыр айында аэродромда жоспарлы жөндеу-қалпына келтіру жұмыстары аяқталды. Жұмыс барысында ұшу-қону жолағының жекелеген учаскелері жөнделіп, таңбалар жаңартылды және жарық-сигналдық жабдықтар ауыстырылды.
Әуежай басшылығы алдағы уақытта да жаңа бағыттар ашу, халықаралық серіктестікті кеңейту және жолаушыларға қауіпсіз әрі сапалы қызмет көрсету бағытындағы жұмыстарды жалғастыратынын мәлімдеді.
