Бұл туралы Үкімет отырысында айтылды. Премьер-министр Мемлекет басшысының тапсырмасына сәйкес елдің инвестициялық ахуалын жақсарту және экономиканың басым секторларында қосылған құнды арттыратын ірі жобаларды іске асыру жұмыстары жалғасып жатқанын атап өтті.
«Осы тұрғыда әрбір министр мен әкімнің алдына инвестиция тарту бойынша нақты индикаторлар мен міндеттер қойылды. Биыл 25,5 млрд доллар шетелдік инвестиция және негізгі капиталға 31,5 трлн теңге инвестиция тартуға тиіспіз», — деді Олжас Бектенов.
Үкімет басшысы бұл бағыттағы жұмысты күшейту қажет екенін айтып, Сыртқы істер министрлігіне мемлекеттік органдармен бірлесіп жоспарлы көрсеткіштерге қол жеткізу бойынша үйлестіруді тапсырды.
Сонымен қатар Сыртқы істер министрлігі Бас прокуратурамен бірге инвестициялық жобаларды қолдау және шетелдік инвесторлардың заңды құқықтарын қорғау тетіктерін жетілдіруі тиіс екені айтылды.
Үкіметтің мәліметінше, аталған шаралар ел экономикасына тікелей инвестициялар көлемін ұлғайтуға және ірі жобаларды тиімді іске асыруға бағытталған.
