ADYM.KZ / Қазақстанда стратегиялық цифрлық майнингті дамытуға бағытталған жаңа тетік енгізілді. Бұл туралы Жасанды интеллект және цифрлық даму министрлігі хабарлады.
Ведомство әзірлеген стратегиялық цифрлық майнингті жүзеге асыру қағидалары Үкімет қаулысымен бекітілді. Жаңа механизм цифрлық майнинг саласындағы ірі инвестициялық жобаларды іске асыруға жағдай жасап, саланың инвестициялық тартымдылығын арттыруға және елдегі цифрлық активтер индустриясын дамытуға бағытталған.
Бағдарламаға қатысу ерікті негізде жүзеге асырылады. Стратегиялық цифрлық майнер мәртебесін белгіленген талаптарға сәйкес келетін және тиісті өтінім берген компаниялар ғана ала алады.
Өтінімдер ашықтық пен объективтілікті қамтамасыз ету мақсатында Жасанды интеллект және цифрлық даму министрлігі жанындағы арнайы комиссияда қаралады. Комиссия құрамына мүдделі мемлекеттік органдардың өкілдері қатысады.
Мәртебеге ие болған компаниялар электр энергиясын өндіруші ұйымдармен 10 жылға дейінгі мерзімге тікелей келісімшарт жасасуға мүмкіндік алады. Бұл ретте электр энергиясының бағасы заңнамада белгіленген шекті тарифтен аспауы тиіс.
Сонымен қатар стратегиялық цифрлық майнерлер Ұлттық стратегиялық крипторезервке өндірілген цифрлық активтердің 10 пайызын аударады. Бұл үлес электр энергиясын сатып алу және жеткізу шығындары есепке алынғаннан кейін қалған цифрлық активтер көлемінен есептеледі.
Министрлік мәліметінше, Ұлттық стратегиялық крипторезерв бюджет қаражатын пайдаланбай қалыптастырылады. Резерв тек бағдарламаға ерікті түрде қатысатын стратегиялық цифрлық майнерлердің үлесі есебінен толықтырылады.
«Қазақстанда цифрлық активтерді дамыту үшін бәсекеге қабілетті әрі инвестициялық тартымды юрисдикцияны кезең-кезеңімен қалыптастырып келеміз. Стратегиялық цифрлық майнинг институтын енгізу — осы бағыттағы маңызды қадам», — деп атап өтті Жасанды интеллект және цифрлық даму министрлігі.
Айта кетейік, бұған дейін Қазақстан пайдаланылмай жатқан газ ресурстарын цифрлық майнинг саласында қолдану мүмкіндігін қарастырып жатқаны хабарланған болатын.
