ADYM.KZ / Жасанды интеллект көмегімен түсірілген фильмдерге арналған халықаралық Astana AI Film Festival (AAIFF 2026) фестиваліне қызығушылық артып келеді. Өтінім қабылдау басталғаннан кейін небәрі 17 күн ішінде ұйымдастырушылар әлемнің 50 елінен 300-ден астам жұмыс қабылдаған.
Фестиваль дирекциясының мәліметінше, тіркелген өтінімдердің 86 пайызы шетелдік қатысушылардан түскен. Ең көп жұмыс Қазақстан, Ресей, АҚШ, Оңтүстік Корея және Қытайдан жолданған. Сонымен қатар Ұлыбритания, Нидерланд, Италия, Испания, Үндістан, Түркия, Сингапур, Германия, Жапония, Франция, Канада, Аустралия және басқа да елдердің авторлары қатысуға ниет білдірген.
Ұйымдастырушылардың айтуынша, бұл көрсеткіш жасанды интеллект арқылы жасалатын киноның әлемдік креативті индустриядағы жаңа бағытқа айналып келе жатқанын аңғартады. Сондай-ақ Қазақстан осы саланы дамытуға арналған маңызды халықаралық алаңдардың біріне айналып отыр.
Мамандардың пікірінше, фестивальге деген жоғары қызығушылық AI технологиялары мен кино өндірісінің жаңа форматтары әлемнің түкпір-түкпіріндегі шығармашылық өкілдерін біріктіре алатынын дәлелдейді.
Бұған дейін креативті индустрия өкілдерімен кездесуде Қазақстан Президенті Қасым-Жомарт Тоқаев Astana AI Film Festival-ді креативті индустриядағы түбегейлі өзгерістерді көрсететін әлемдік деңгейдегі маңызды бастамалардың бірі ретінде бағалаған болатын. Мемлекет басшысы мұндай жобалар Қазақстанның халықаралық аренадағы инновациялар мен жасампаз идеялардың орталығы ретіндегі беделін арттыруға ықпал ететінін атап өткен.
Еске салсақ, Astana AI Film Festival 2026 жылғы 28 қыркүйек пен 1 қазан аралығында Астанада өтеді. Фестивальдің басты оқиғасы жалпы жүлде қоры 1 миллион АҚШ долларын құрайтын халықаралық қысқаметражды AI-фильмдер байқауы болады.
Биылғы негізгі байқау маусымының тақырыбы – «The Future Worth Living In» («Өмір сүруге тұрарлық болашақ»). Сонымен қатар қатысушылар бес номинация бойынша бақ сынайды: үздік режиссура, үздік визуалды шешім, үздік оқиға, үздік тұжырымдама және үздік кейіпкер.
Фестивальге өтінім қабылдау 2026 жылғы 15 тамызға дейін жалғасады.
