ADYM.KZ / Қазақстанда 2026 жылғы 1 шілдеден бастап Салық кодексіне бірқатар өзгеріс енгізу жоспарланып отыр. Түзетулердің бірі ұлттық валютаның атауын мемлекеттік тіл нормасына сәйкестендіруге қатысты.
Заң жобасына сәйкес, Салық кодексінің барлық баптарында қолданылып келген «тенге» сөзі «теңге» деп өзгертіледі. Осылайша ұлттық валюта атауы қазақ тіліндегі ресми жазылуына толық сәйкестендірілмек.
Құжатта бұдан бөлек терминологиялық және редакциялық сипаттағы түзетулер де қарастырылған. Атап айтқанда, мемлекеттік басқару жүйесіндегі өзгерістерге байланысты бірқатар норманы жаңарту ұсынылып отыр.
Заң жобасына сәйкес, кейбір баптардағы «Парламент» ұғымы «Құрылтай» атауымен ауыстырылады. Сондай-ақ «Қазақстан Республикасы Парламенті» тіркесінің орнына «Қазақстан Республикасы Құрылтайы, Қазақстан Халық Кеңесі» деген жаңа редакция енгізу көзделген.
Сонымен қатар Конституциялық сотқа қатысты жекелеген нормаларды алып тастау және кейбір терминдерді қолданыстағы заңнамамен сәйкестендіру ұсынылған.
Түзетулер жаңа конституциялық модель талаптарына бейімдеу мақсатында әзірленген. Бұған дейін Конституция күшіне енгеннен кейін 2026 жылғы 1 шілдеден бастап Құрылтай мен Қазақстан Халық Кеңесі ресми түрде жұмысын бастауы тиіс екені хабарланған болатын.
Заң жобасы қабылданған жағдайда Салық кодексіне енгізілетін өзгерістер 2026 жылғы 1 шілдеден бастап күшіне енеді.
