ADYM.KZ / Қазақстанда ипотекалық тұрғын үй қарыздары бойынша пайыздық мөлшерлемені есептеудің жаңа тәртібін енгізу мерзімі кейінге қалдырылуы мүмкін. Тиісті қаулы жобасын Қаржы нарығын реттеу және дамыту агенттігі мен Ұлттық банк бірлесіп әзірлеп, қоғамдық талқылауға ұсынды.
«Ашық НҚА» порталында жарияланған құжатқа сәйкес, ипотекалық тұрғын үй қарыздарының жылдық тиімді сыйақы мөлшерлемесін (ЖТСМ) кепіл құны мен несие сомасының арақатынасына (LTV коэффициенті) қарай белгілеу тәртібін енгізу 2027 жылғы 1 қаңтарға ауыстырылады.
Бұған дейін аталған өзгерістерді 2026 жылғы 1 шілдеден бастап қолданысқа енгізу жоспарланған болатын.
Жаңа тәртіп күшіне енген жағдайда бастапқы жарнасы жоғары азаматтар үшін ипотека шарттары анағұрлым тиімді болуы мүмкін. Атап айтқанда, егер несие көлемінің тұрғын үй құнына қатынасы 70 пайыздан аспаса, яғни қарыз алушы баспана бағасының кемінде 30 пайызын өз қаражатынан төлесе, ипотека бойынша шекті жылдық тиімді сыйақы мөлшерлемесі 20 пайыз деңгейінде белгіленеді.
Ал LTV коэффициенті 70 пайыздан жоғары болған жағдайда, яғни бастапқы жарна көлемі төмен болса, шекті мөлшерлеме бұрынғыдай 25 пайыз болып қалады.
Қаулы жобасында 2026 жылғы 1 шілде мен 2027 жылғы 1 қаңтар аралығында ипотекалық тұрғын үй қарыздары бойынша жылдық тиімді сыйақы мөлшерлемесінің шекті деңгейі 25 пайыз көлемінде сақталатыны көрсетілген.
Құжат қазіргі уақытта қоғамдық талқылаудан өтіп жатыр.
