ADYM.KZ / Қазақстанда жыл басынан бері заңсыз қару айналымына қарсы жүргізілген шаралар барысында 1200-ден астам қару тәркіленді. Бұл туралы Ішкі істер министрлігі мәлімдеді.
Ведомствоның мәліметінше, биылғы бес айда өткізілген «Қару» және «Құқықтық тәртіп» жедел-профилактикалық іс-шаралары нәтижесінде қылмыстық айналымнан әртүрлі санаттағы қарулар алынған.
Тәркіленген қарулардың қатарында 18 автомат, екі гранатаатқыш, 320-дан астам тапанша, 100-ден астам ойық ұңғылы қару және 700 тегіс ұңғылы мылтық бар. Олардың арасында 2022 жылғы Қаңтар оқиғасы кезінде қолды болған 120 қару анықталған.
ІІМ мәліметінше, мамыр айында Алматы қаласы мен Алматы облысында тіркелмеген бірнеше қару тәркіленген. Тергеу барысында олардың бір бөлігі Қаңтар оқиғалары кезінде қару-жарақ дүкендерінен ұрланғаны белгілі болған.
Сонымен қатар 20 сәуірден бастап республика бойынша заңсыз сақталған атыс қаруын, оқ-дәрілер мен жарылғыш заттарды ерікті түрде тапсыру акциясы жүргізілуде. Науқан жыл соңына дейін жалғасады.
ІІМ Криминалдық полиция департаментінің бастығы Қанат Нұрмағамбетовтің айтуынша, бүгінге дейін азаматтар өз еркімен шамамен 750 қару мен 4 мыңға жуық оқ-дәріні тапсырған.
Министрлік заңсыз сақталған қаруды, оқ-дәрілер мен жарылғыш заттарды өз еркімен тапсырған азаматтар қылмыстық және әкімшілік жауапкершіліктен босатылатынын еске салды.
Ведомство өкілдері тұрғындарды заңсыз сақталған қару-жарақты тапсырып, қоғамдық қауіпсіздікті қамтамасыз етуге атсалысуға шақырды.
