ADYM.KZ / Қаладағы жастар саясатының ең маңызды әрі өзекті бағыттарының бірі — отбасы институтын нығайту және өскелең ұрпақтың бойында ұлттық құндылықтарды қалыптастыру. Бүгінгі таңда жастарды жат ағымдардан, теріс әдеттерден қорғап, оларды отансүйгіштікке, үлкенге құрметпен қарауға тәрбиелеу мақсатында қаламызда ауқымды жұмыстар атқарылуда. Себебі, мемлекеттің тұрақтылығы мен болашағы әрбір шаңырақтағы тәлім-тәрбиеден бастау алады.
Мемлекет басшысы Қасым-Жомарт Тоқаев өзінің Қазақстан халқына арнаған Жолдауларында отбасы құндылықтарын сақтау мен ұрпақ тәрбиесіне ерекше назар аударып келеді. Президент ұлттың сапасын арттыру, саналы да бәсекеге қабілетті азамат қалыптастыру тікелей отбасындағы тәрбиеге байланысты екенін үнемі қадап айтады.
«Біз жастарымызды төл мәдениетіміз бен салт-дәстүріміздің рухында тәрбиелеуіміз керек. Берік отбасы — бақуатты мемлекеттің кепілі», — деген Мемлекет басшысының сөзі бүгінгі қоғамдық-идеологиялық жұмыстардың темірқазығына айналды. Ұрпақ тәрбиесіндегі олқылықтардың орнын толтырып, жастарды отбасылық өмірге дайындау — қазіргі уақыттың басты талабы.
«Көркем әжелер» тәлімі: Ұрпақтар сабақтастығы. Осы орайда, Отбасы күніне орай Жастар ресурстық орталығының ұйымдастыруымен Индустриалды-техникалық колледж студенттері арасында маңызды танымдық кездесу өтті. Шараның басты мақсаты — жастар арасында отбасы құндылықтарын дәріптеу, ұлттық тәрбиенің негіздерін түсіндіру және ұрпақтар сабақтастығын жалғастыру.
Жиынға Шымкент қаласы ішкі саясат басқармасы «Қоғамдық келісім» КММ жанындағы Аналар кеңесінің «Көркем әжелер» тобының мүшелері арнайы шақырылды. Көпті көрген, өмірлік тәжірибесі мол Тәттігүл Атенова, Забира Мукашева, Рабиға Еркінбекова және Сырға Жуманова жастармен емен-жарқын сырласып, өнегелі әңгіме өрбітті.
Кездесу барысында спикерлер отбасының маңызы мен сыйластық; ерлі-зайыптылар арасындағы құрмет, үлкенді сыйлау мен кішіге қамқор болу сияқты адами құндылықтар; ұлттық тәрбие: қазақы салт-дәстүрлердің заманауи өмірдегі орны және оларды сақтап қалудың маңыздылығы; уақыт қадірі: Жастарды бос істерге ұрынбай, алтын уақытты тиімді пайдалануға баулу; салауатты өмір салты: білім алуға үздіксіз ұмтылу және спортпен шұғылдануды күнделікті дағдыға айналдыру бағытындағы қоғам үшін келелі тақырыптарды қозғады.
Кездесу тек үлкендердің ақылын тыңдаумен шектелмей, еркін пікір алмасу алаңына ұласты. Ашық диалогта жастардың ойы естілді. Студенттер өздерін толғандырып жүрген сауалдарын қойып, өмірлік тәжірибесі мол аналардан, әжелерден салиқалы жауаптар алды. Жастар тарапынан болашақ мамандық, отбасын құрудағы жауапкершілік және заманауи трендтер мен дәстүрдің үйлесімі туралы сұрақтар көп қойылды.
Түйін: Мұндай мағыналы шаралар жастардың дүниетанымын кеңейтіп қана қоймай, олардың бойында жауапкершілік сезімін оятады. Отбасы құндылығын ұғынған жас буын — елдің ертеңін жарқын ететін, мызғымас мемлекеттің тірегіне айналары сөзсіз.
