ADYM.KZ / Қазақстанда банкроттық рәсімдерін цифрландыру жұмыстары қарқынды жалғасуда. Бұл туралы Мемлекеттік кірістер комитетінің баспасөз қызметі хабарлады.
Ведомствоның мәліметінше, жеке тұлғалардың, жеке кәсіпкерлердің және заңды тұлғалардың банкроттық рәсімдерін жетілдіру мақсатында бірқатар цифрлық шешімдер енгізіліп жатыр. Нәтижесінде рәсімдер қатысушылар үшін қолжетімді әрі ашық бола түскен.
Бұрын банкроттыққа қатысты құжаттар мен өтініштер қағаз түрінде немесе әртүрлі ақпараттық жүйелер арқылы тапсырылса, бүгінде процестердің басым бөлігі электрондық форматқа көшірілген.
2024 жылдың қазан айынан бастап заңды тұлғалар мен жеке кәсіпкерлердің оңалту және банкроттық рәсімдері Салық төлеушінің кабинеті арқылы онлайн режимде жүргізіле бастады. Бұл рәсім әкімшілері, кредиторлар және мемлекеттік органдар арасындағы өзара іс-қимылды едәуір жеңілдеткен.
Ал 2026 жылдың басынан бері жаңа электрондық сервистер іске қосылды. Олардың қатарында банкроттық рәсімдері туралы хабарландыруларды автоматты түрде жариялау, рәсімдердің барысы жөніндегі өзекті ақпаратқа қол жеткізу және борышкерлерге қатысты мәліметтерді электронды түрде алу мүмкіндігі бар.
Комитеттің мәліметінше, жаңа цифрлық құралдар тәжірибеде белсенді қолданылуда. Тек 2025 жылдың өзінде рәсім әкімшілері оңалту және банкроттық процестерінің барысы туралы 3 мыңнан астам өзекті ақпарат жариялаған.
Сонымен қатар, жеке тұлғалардың банкроттық рәсімдерін жетілдіру жұмыстары жалғасуда. Qoldau жүйесінде кредиторларға мемлекеттік кірістер органдарының шешімдеріне қатысты шағымдарды электрондық форматта жолдау мүмкіндігі берілген.
Ведомство банкроттық рәсімдеріне қатысушылар арасында түсіндіру жұмыстарын да тұрақты жүргізіп келеді. Соның нәтижесінде негізсіз өтініштер саны азайып, азаматтардың өтініштерін қарау мерзімі қысқарып, мемлекеттік органдар мен қатысушылар арасындағы өзара іс-қимыл тиімділігі артқан.
Мемлекеттік кірістер комитетінің хабарлауынша, цифрландыру шаралары ақпарат алмасу мерзімдерін қысқартып, қағаз құжат айналымын азайтуға, мемлекеттік қызметтердің қолжетімділігін арттыруға және банкроттық рәсімдерінің ашықтығын қамтамасыз етуге мүмкіндік береді.
