ADYM.KZ / Бүгін Сенаттың жалпы отырысында «Қазақстан Үкіметі мен Өзбекстан Үкіметі арасындағы Қазақстан-Өзбекстан мемлекеттік шекарасының режимі туралы келісімді ратификациялау туралы» заң мақұлданды.
Аталған келісімге 2024 жылғы 8 тамызда Астанада Өзбекстан Президентінің Қазақстанға ресми сапары барысында екі елдің сыртқы істер министрлері қол қойған болатын.
Сенатор Ғалиасқар Сарыбаевтың айтуынша, құжат Қазақстан мен Өзбекстан арасындағы мемлекеттік шекара режимін реттеудің бірыңғай халықаралық-құқықтық тетігін қалыптастыруға бағытталған. Келісім 2001 жылғы мемлекеттік шекара туралы шарттың ережелерін іске асыру және 2022 жылы екі ел арасындағы шекараны демаркациялау жұмыстарының толық аяқталуы нәтижесінде әзірленген.
Құжат мемлекеттік шекара мен шекара белгілерін күтіп-ұстау, азаматтар мен көлік құралдарын, жүктерді өткізу тәртібі, шекара маңындағы шаруашылық қызметті жүргізу және шекаралық оқиғаларды реттеу мәселелерін қамтиды.
Бұған дейін шекара маңындағы өзара іс-қимылдың жекелеген мәселелері ұлттық заңнама және екіжақты келісімдер арқылы реттеліп келген. Енді жаңа келісім Қазақстан-Өзбекстан мемлекеттік шекарасы режимін кешенді түрде реттеуге мүмкіндік береді.
Сенатордың сөзінше, Қазақстан мұндай келісімдерді Қытай, Қырғызстан және Түрікменстанмен де жасаған. Ал Қазақстан-Ресей мемлекеттік шекарасын демаркациялау толық аяқталғаннан кейін Ресеймен де осындай құжат әзірлеу жоспарланып отыр.
Өзбекстан тарапы келісімді 2025 жылғы 26 қаңтарда ратификациялаған. Заңды қабылдау қосымша бюджет шығындарын талап етпейді және әлеуметтік-экономикалық немесе құқықтық теріс салдарға әкелмейді.
