ADYM.KZ / «Қазақстан жол ғылыми-зерттеу институты» АҚ (ҚазжолҒЗИ) Үлкен Алматы айналма автомобиль жолының (ҮАААЖ) техникалық жағдайын кешенді диагностикалау жұмыстарына кірісті. Бұл туралы Көлік министрлігі хабарлады.
Бүгінде ҮАААЖ Алматы қаласы мен Алматы облысының көлік инфрақұрылымындағы маңызды нысандардың бірі саналады. Айналма жол қала көшелеріндегі көлік жүктемесін азайтып, транзиттік тасымалдардың тиімділігін арттыруға және өңірдің логистикалық әлеуетін дамытуға мүмкіндік беріп отыр.
Министрлік мәліметінше, диагностика барысында жол жамылғысының жай-күйі бағаланып, оның тегістігі, ілінісу коэффициенті және кедір-бұдырлық көрсеткіштері зерттеледі. Сондай-ақ жолдағы ақаулар анықталып, көпірлер, жол өткелдері мен басқа да инженерлік құрылыстардың техникалық жағдайы тексеріледі.
Бұдан бөлек, жол төсемі мен конструкцияларының нақты жағдайын анықтауға бағытталған аспаптық және зертханалық зерттеулер жүргізілуде. Зерттеу қорытындылары негізінде ҚазжолҒЗИ мамандары ҮАААЖ-ды күтіп-ұстау, жөндеу және одан әрі дамыту бойынша ғылыми негізделген ұсынымдар әзірлейді.
Ведомствоның хабарлауынша, алынған нәтижелер жолдың пайдалану мерзімін ұзартуға, оның сенімділігі мен қауіпсіздігін арттыруға, сондай-ақ жол инфрақұрылымын басқарудың заманауи цифрлық тәсілдерін енгізуге негіз болады.
Сонымен қатар ҚазжолҒЗИ салмақтық-габариттік бақылау жүйесін жетілдіру бағытында да жұмыс жүргізіп жатыр. Мамандар автокөлік құралдарының салмақтық және габариттік параметрлерін автоматты түрде өлшейтін жүйелерге қойылатын талаптарды айқындайтын нормативтік құжаттың алғашқы редакциясын әзірледі.
Көлік министрлігінің мәліметінше, бұл шешімдер ауыр жүк көліктерінің қозғалысын тиімді бақылауға және жол инфрақұрылымының сақталуын қамтамасыз етуге мүмкіндік береді.
Алдағы уақытта тараптар цифрлық мониторинг, зияткерлік көлік жүйелері, деректерді автоматтандырылған жинау және халықаралық стандарттарға сай инновациялық технологияларды енгізу бағытындағы ынтымақтастықты кеңейтуді жоспарлап отыр.
