ADYM.KZ / Қазақстанда Ұлттық бірыңғай тестілеуді (ҰБТ) алмастыратын жаңа қабылдау емтиханының (Admissions Insight Test – AIT) моделі әзірленіп жатыр. Бұл туралы Ғылым және жоғары білім министрлігі хабарлады.
Астанада ETS халықаралық ұйымының өкілдері AIT емтиханының жаңа моделін әзірлеуге арналған кешенді зерттеу нәтижелерін таныстырды. Іс-шара барысында қолданыстағы бағалау жүйесіне жүргізілген талдау, халықаралық тәжірибені салыстырмалы зерттеу қорытындылары және жоғары оқу орындарының қажеттіліктеріне жүргізілген сараптама ұсынылды.
Сонымен қатар кадрлық әлеуетке берілген баға, бағалау процесінде жасанды интеллект технологияларын пайдалану мүмкіндіктері және болашақ емтихан құрылымына қойылатын негізгі талаптар талқыланды.
Министрліктің мәліметінше, жаңа емтихан талапкерлердің тек пәндік білімін ғана емес, академиялық құзыреттерін де жан-жақты бағалауға бағытталады. Атап айтқанда, сыни ойлау, талдау жасау, ақпарат пен академиялық мәтіндермен жұмыс істеу, өз ойын жүйелі әрі дәлелді жеткізу және білімін түрлі жағдайда қолдану қабілеттеріне басымдық беріледі.
Жаңа модель аясында тест тапсырмаларының сапасын арттыру, олардың тілдік түсініктілігін қамтамасыз ету, әртүрлі тілдердегі нәтижелердің салыстырмалылығын сақтау және бағалау рәсімдерінің объективтілігін күшейту көзделіп отыр.
Бұдан бөлек, тест тапсырмаларының қорын кеңейту, тест нұсқаларын автоматты түрде қалыптастыру және емтихан нәтижелері бойынша аналитикалық есептілікті жетілдіру мәселелері де қарастырылған.
Министрлік жаңа модельді пилоттық сынақтан өткізу кезеңінде қолданыстағы ҰБТ жүйесі өз жұмысын жалғастыратынын атап өтті.
Ведомствоның мәліметінше, жаңа бағалау жүйесіне көшу зерттеу нәтижелері, пилоттық апробация қорытындылары, сарапшылардың ұсынымдары және академиялық қауымдастықтың пікірлері негізінде кезең-кезеңімен жүзеге асырылады.
Ғылым және жоғары білім министрлігі Ұлттық тестілеу орталығымен бірлесіп, халықаралық стандарттарға сәйкес келетін, ашықтық пен тең мүмкіндіктер қағидатына негізделген ұлттық білімді бағалау жүйесін жетілдіру жұмыстарын жалғастырады.
