ADYM.KZ / ҚР Сауда және интеграция министрі Арман Шаққалиевтің Нидерланд Корольдігіне жұмыс сапары аясында өткен Қазақстан-Нидерланд бизнес-форумы табысты аяқталды. Шара қорытындысы бойынша жалпы сомасы 160 млн еуроны құрайтын бірлескен жобаларды іске асыру туралы маңызды келісімдерге қол қойылды.
Бұл туралы ведомствоның баспасөз қызметі мәлім етті. Іскерлік кездесу Амстердамдағы беделді халықаралық GreenTech Amsterdam 2026 көрмесі алаңында ұйымдастырылып, екі елдің сауда-экономикалық миссиясының негізгі оқиғасына айналды.
Биылғы халықаралық көрмеге әлемнің 40-тан астам елінен 500-ден астам компания қатысып, келушілер географиясы 120 елді қамтыды. Осындай ауқымды шараның ашылу салтанатында шетелдік қонақтар арасынан тек Қазақстан мен Біріккен Араб Әмірліктерінің министрлері ғана құттықтау сөз сөйледі. Бұл еліміздің агротехнологиялар мен агроөнеркәсіп саласындағы халықаралық рөлі жоғары бағаланатынын көрсетеді.
«Бүгінгі уағдаластықтар екі ел бизнесінің өзара қызығушылығының жоғары деңгейін растайды. Қазақстан еуропалық нарықтарға сапалы өнім жеткізуді кеңейтуге және инвестициялық жобалар үшін қолайлы жағдайлар жасауға дайын», — деп атап өтті Арман Шаққалиев.
Нидерланды Қазақстанның Еуропалық Одақтағы ең ірі сауда серіктестерінің бірі. Статистикалық мәліметтер бұл байланыстың серпінді дамып жатқанын дәлелдейді: Тауар айналымы 2026 жылдың қаңтар–ақпан айларының қорытындысы бойынша өзара сауда көлемі өткен жылдың сәйкес кезеңімен салыстырғанда 57,9 пайызға ұлғайып, 970 млн АҚШ долларына жетті. Қазақстандық экспорттаЕуропаға бағытталған отандық өнім көлемі 65 пайызға өсіп, 930,4 млн АҚШ долларын құрады.
Қазақстандық делегация сапар барысында бірқатар стратегиялық салалар бойынша келіссөздер жүргізді:
Отандық өнімдердің экспорттық рәсімдерін жеделдету үшін мемлекет пен аккредиттелген ұйымдардың бірлескен инспекциялық бақылау моделі зерделенді. Naktuinbouw ұйымымен тұқым шаруашылығы, сертификаттау және өнімнің қадағалануын қамтамасыз ететін заманауи жүйелерді енгізу мәселелері талқыланды.
Делегация Еуропадағы ең ірі теңіз хабы Роттердам портына барды. Тараптар қазақстандық өнімдерді еуропалық логистикалық тізбектерге интеграциялауды және Транскаспий халықаралық көлік бағытының (Орта дәліз) әлеуетін арттыруды пысықтады.
Әлемге әйгілі Damen Shipyards Group компаниясымен маңызды Меморандумға қол қойылды. Сәтті өткен келіссөздер нәтижесінде Маңғыстау облысында технологияларды тарту және өндірісті жергіліктендіру арқылы заманауи кеме жасау және кеме жөндеу кластері құрылатын болады.
Axia Seeds және DENSO AgriTech Solutions компанияларымен өткен кездесулерде отандық жылыжай шаруашылығы мен тұқым өндірісіне инвестиция тарту, жаңа технологияларды енгізу мәселелері мақұлданды.
Сапар қорытындысы бойынша екі мемлекет те сауда-экономикалық қатынастарды жаңа деңгейге көтеруге уағдаласты. Алдағы уақытта ауыл шаруашылығы, логистика, инновациялар мен стратегиялық минералдық ресурстар салалары серіктестіктің басты қозғаушы күші болмақ.
