ADYM.KZ / Қазақстанда жұмыс берушілер бос жұмыс орындары туралы мәліметтерді Электрондық еңбек биржасы Enbek.kz сайтына уақытылы жариялауға міндетті. Еңбек және халықты әлеуметтік қорғау министрлігі жұмысқа қабылдау және жұмыссыз азаматтарды есепке алу тәртібін түсіндірді.
Министрліктің мәліметінше, жұмыс берушіде бос жұмыс орны пайда болған күннен бастап бес жұмыс күні ішінде ол туралы ақпаратты Enbek.kz платформасына орналастыруы қажет. Бұл ретте бос жұмыс орны қызметкер ресми түрде жұмысқа қабылданғанға дейін жариялануы тиіс.
Мұндай талап еңбек нарығындағы бос жұмыс орындары туралы ақпараттың өзектілігін қамтамасыз етуге бағытталған. Бірыңғай цифрлық платформа арқылы азаматтар қолжетімді жұмыс орындары туралы ақпаратпен танысып, өзіне сәйкес қызметті іздей алады.
Талапты бұзғандарға жауапкершілік қарастырылған
Бос жұмыс орындарын белгіленген мерзімде жарияламаған, сондай-ақ алдағы уақытта қызметкерлердің жұмыстан босатылатыны туралы мәліметтерді ұсынбаған жұмыс берушілер әкімшілік жауапкершілікке тартылуы мүмкін.
Заң бұзушылықтың сипаты мен оның қайталануына қарай ескерту жасалады. Ал талаптарды қайта бұзған жағдайда әкімшілік айыппұл салынады.
Министрлік жұмыс берушілерді қызметкерді жұмысқа қабылдау кезінде еңбек заңнамасының талаптарын сақтауға шақырды. Атап айтқанда, бос жұмыс орындарын Enbek.kz сайтына уақытылы жариялап, қызметкер жұмысқа орналасқаннан кейін электрондық еңбек шартын тіркеу және міндетті әлеуметтік әрі зейнетақы аударымдарын уақытылы жүргізу қажет.
Жұмысқа орналасқан азаматты есептен шығару автоматты түрде жүргізіледі
Еңбек министрлігі жұмыссыз ретінде тіркелген азаматтардың жұмысқа орналасқаннан кейінгі мәртебесін жаңарту тәртібіне де түсініктеме берді.
Қазақстанда бұл процесс мемлекеттік ақпараттық жүйелердің өзара ықпалдастығы арқылы автоматтандырылған түрде жүзеге асырылады. Азамат жұмысқа орналасқан жағдайда бес жұмыс күні ішінде мансап орталығына тиісті ақпарат беруге міндетті.
Алайда азаматтың мансап орталығына өзі бармауы оның жұмыссыз мәртебесін жаңартуға кедергі келтірмейді. Егер мемлекеттік ақпараттық жүйелерде оның жұмысқа орналасқаны туралы мәлімет пайда болса, азамат есептен автоматты түрде шығарылады.
Мұндай негіздердің бірі – Еңбек шарттарын есепке алудың бірыңғай жүйесінде электрондық еңбек шартының тіркелуі. Сондай-ақ жұмыс берушінің алғашқы міндетті зейнетақы жарнасын аударуы да азаматтың жұмысқа орналасқанын растайтын негіздердің бірі болып саналады.
Осылайша, азаматтың жұмысқа орналасқаны туралы ақпарат мемлекеттік ақпараттық жүйелерге белгіленген тәртіппен түскен жағдайда, оның қосымша түрде мансап орталығына барып, есептен шығу туралы өтініш беруінің қажеті жоқ.
Министрліктің хабарлауынша, талаптардың сақталуы еңбек қатынастары туралы мәліметтердің анықтығы мен өзектілігін қамтамасыз етіп, жұмыссыз азаматтарды қолдау тетіктерінің тиімді жұмыс істеуіне мүмкіндік береді.
Айта кетейік, бұған дейін авторлық құқық саласындағы Бірыңғай цифрлық платформаның жұмыс істеу тәртібі туралы жазған едік.
