ADYM.KZ / Ағымдағы жылдың алғашқы төрт айында Қазақстанның негізгі капиталына салынған инвестиция көлемі 4,9 трлн теңгеге жетті. Бұл өткен жылдың сәйкес кезеңімен салыстырғанда 6,7 пайызға жоғары. Бұл туралы Ұлттық экономика министрінің орынбасары Арман Қасенов Орталық коммуникациялар қызметінде (ОКҚ) өткен баспасөз мәслихатында мәлімдеді.
Вице-министрдің айтуынша, елдегі инвестициялық белсенділік тұрақты өсім көрсетіп отыр. Сонымен қатар, сыртқы капиталды тарту бағытында да оң динамика бар.
«2025 жылы Қазақстанға тартылған тікелей шетелдік инвестицияның жалпы ағыны 20,5 млрд долларды құрады. Бұл 2024 жылғы көрсеткішпен (17,9 млрд доллар) салыстырғанда 14,4 пайызға көп», — деді Арман Қасенов.
Министрлік өкілі әлемдік жетекші рейтинг агенттіктері Moody’s, Standard & Poor’s және Fitch Қазақстанның инвестициялық рейтингін тұрақты түрде растап отырғанын алға тартты. Сарапшылардың пікірінше, бұл еліміздің экономикалық тұрақтылығы мен сенімділігінің айқын дәлелі.
Бүгінде Қазақстанда шетелдік және отандық бизнес үшін қолайлы экожүйе қалыптасқан.
Компанияларды EGOV порталы арқылы онлайн форматта бірнеше минут ішінде тіркеуге болады. Инвестициялық келісімшарттар аясында кедендік және салықтық преференциялар қарастырылған. Инвесторларға инвестициялық субсидиялар, заттай гранттар мен өзге де көмек түрлері көрсетіледі.
Еске сала кетейік, бұған дейін «Бәйтерек» ұлттық басқарушы холдингі еліміздегі экспортты қолдау мен инвестиция тарту жұмыстарын одан ары күшейтетінін хабарлаған болатын.
