ADYM.KZ / Қазақстан 2026 жылғы «Immigration Index» халықаралық рейтингінде айтарлықтай жоғары нәтиже көрсетіп, ТМД елдері арасында көш бастады. Америкалық танымал «Remitly» компаниясы әзірлеген бұл жаһандық зерттеу әлемнің 82 мемлекетін қамтыған.
Жалпырейтинг қорытындысы бойынша Қазақстан 53-орынға тұрақтап, тізімге енген посткеңестік елдердің бәрін артқа тастады.
Зерттеу нәтижесінде Қазақстан өңірдегі ең тартымды мемлекет ретінде танылды. Тізімге енген өзге көршілес және достас елдердің позициясы мынадай сипат алды: Қазақстан — 53-орын (ТМД бойынша 1-орын); Молдова — 56-орын; Әзербайжан — 66-орын; Армения — 74-орын; Өзбекстан — 75-орын.
Ескерту: Ресей, Беларусь, Қырғызстан, Тәжікстан және Украина елдері бұл жолғы зерттеуге енгізілмеген. Ал әлемдік рейтингте көш басын Швейцария бастап тұр.
«Remitly» сарапшылары мемлекеттерді 16 негізгі санатқа топтастырылған 34 көрсеткіш бойынша жіті бағалаған. Индекс тек құрғақ экономикалық мәліметтерге ғана емес, адамның өмір сүруіне қажетті ең маңызды әлеуметтік факторларға негізделген.
Бағалау кезінде ескерілген басты бағыттар: Қауіпсіздік деңгейі және өмір сапасы; Денсаулық сақтау мен білім беру жүйесінің сапасы; Экологиялық ахуал және қоғамдық көлік инфрақұрылымы; Жұмыспен қамту мүмкіндігі мен тұрғын үйдің қолжетімділігі; Өмір сүру құны (шығындар) және отбасыларға көрсетілетін қолдау; Мигранттар қауымдастығының болуы және жаңа ортаға бейімделу жеңілдігі.
Зерттеу қорытындысы көрсеткендей, бүгінгі таңда тұрғылықты жерін ауыстыратын адамдар үшін тек табыс табу емес, өмір сапасы, жеке қауіпсіздік, медициналық қызметтердің деңгейі және ұзақ мерзімді болашақ құру мүмкіндігі негізгі өлшем болып табылады.
Осы көрсеткіштердің жиынтығы бойынша жоғары балл жинаған Қазақстан 2026 жылы ТМД кеңістігіндегі көшіп келуге ең қауіпсіз әрі қолайлы ел мәртебесін иеленіп отыр.
