ADYM.KZ / Қазақстан мен Оңтүстік Корея арасында жаңа Алатау қаласын бірлесіп дамыту бойынша үкіметаралық келісімдер әзірленіп жатыр. Бұл туралы ҚР Өнеркәсіп және құрылыс министрі Ерсайын Нағаспаев Қазақстан-Корея бірлескен комиссиясының сауда-экономикалық және ғылыми-техникалық ынтымақтастық бойынша өткен 11-отырысында мәлімдеді.
Министрдің айтуынша, бұл ауқымды жоба еліміздің болашақ технологиялық хабына айналады және корей бизнесі үшін бірегей мүмкіндіктерге жол ашады. Жуырда ғана елімізде Алатау қаласының арнайы құқықтық мәртебесін бекітетін Конституциялық заң қабылданған болатын. Бұл құжат аясында сыртқы инвесторлар мен бизнес өкілдері үшін бұрын-соңды болмаған қолайлы жағдайлар жасалмақ.
Қала аумағында бюрократиялық кедергілер барынша азайтылып, әкімшілік рәсімдер оңтайландырылады. Бизнесті дамыту мен қорғаудың ең заманауи халықаралық тетіктері қолданылады. Корей компаниялары тек өндіріс емес, қалалық инфрақұрылымды, туризм және қонақүй бизнесін өркендетуге де шақырылып отыр.
Жол картасы Қазақстан тарапы Корея Республикасының Жер, инфрақұрылым және көлік министрлігін, сондай-ақ, KIND корпорациясын негізгі институционалдық серіктес ретінде көреді. Осы ретте мемлекет пен жеке меншік серіктестігін дамытуда әлемдік деңгейде тиімділігін дәлелдеген «One Team Korea» бастамасына үлкен қолдау білдірілді.
Министрдің мәлімдемесінен: «Қазақстан тарапының ұсынысымен, Алатау қаласын дамыту бойынша үкіметаралық келісімдер дайындалып жатыр. Бұл құжат екі ел арасындағы ынтымақтастықты нығайтып қана қоймай, алдағы ауқымды жұмыстардың нақты Жол картасын анықтайды және бірлескен жобаларды тиімді жүзеге асыруға қажетті құқықтық механизмдерді құрады».
Алатау қаласын салу Қазақстанның жаһандық деңгейдегі ең амбициялы әрі стратегиялық маңызды жобаларының бірі. Оңтүстік Кореяның озық технологиялық тәжірибесі мен инвестициясын тарту арқылы бұл аймақ қысқа мерзімде Орталық Азиядағы инновациялар мен жаңа технологиялардың басты орталығына айналмақ.
