ADYM.KZ / Қазақстан Республикасы Көлік министрлігі еліміздегі автокөліктерді техникалық байқаудан (техосмотр) өткізу жүйесін түбегейлі жаңартуды жоспарлап отыр. Министрліктің баспасөз қызметінің хабарлауынша, бұл қадам қызмет көрсету сапасын арттыруға, заманауи технологияларды енгізуге және үдерістің тиімділігін арттыруға бағытталған.
Осы мақсатта Көлік министрлігінің, Қаржы министрлігінің және «Қазақстан жол ғылыми-зерттеу институты» АҚ-ның (ҚазжолҒЗИ) өкілдерінен құралған отандық делегация Испания Корольдігіне арнайы жұмыс сапарымен барды.
Сапар аясында қазақстандық мамандар техникалық байқау саласындағы әлемдік көшбасшылармен маңызды уағдаластықтарға қол жеткізді. ҚазжолҒЗИ мен техникалық байқау станцияларына арналған жабдықтарды әзірлейтін және өндіретін бұл халықаралық компания арасында ынтымақтастық туралы құжатқа қол қойылды. Меморандум бірлескен жобаларды дамытуды, тәжірибе алмасуды және озық технологияларды енгізуді көздейді.
Делегация мүшелері танымал DEKRA компаниясының техникалық байқау орталығының жұмысын жіті зерттеді. Онда көлік құралдарын диагностикалаудың заманауи әдістері, автоматтандырылған бақылау жүйелері мен цифрлық шешімдер таныстырылды.
Еуропалық тәжірибені енгізу арқылы Қазақстанда техникалық байқау рәсімдерінің ашықтығы мен объективтілігі толықтай қамтамасыз етілмек. Көлік министрлігінің хабарлауынша, алдағы уақытта мынадай маңызды технологиялық жаңалықтар күтілуде:
Автоматты деректер беру: Диагностикалық жабдықтардан алынған мәліметтер операторлардың (адамның) қатысуынсыз, жүйеге автоматты түрде жолданады. Бұл сыбайлас жемқорлық пен деректерді қолдан өзгерту қаупін жояды. Тәулік бойы онлайн-бақылау: Техникалық байқау процесі онлайн-бейнемониторинг жүйелері арқылы 24/7 режимінде қатаң қадағаланады.
Ресми ведомствоның мәлімдеуінше, бұл реформалар еліміздегі техникалық байқаудың сапасын жаңа деңгейге көтереді. Ал ең бастысы заңсыз техосмотрдан өту жағдайларын шектеп, республика жолдарындағы қозғалыс қауіпсіздігін айтарлықтай күшейтуге мүмкіндік береді.
