ADYM.KZ / Шымкент қаласы Жастар саясаты басқармасына қарасты «Жастар ресурстық орталығы» КММ-нің ұйымдастыруымен «Кәсіби бағдар беру және еңбек нарығына бейімдеу» жобасы аясында жоғары сынып оқушыларына арналған танымдық кездесулер жалғасуда. Бастама жасөспірімдерге болашақ мамандығын саналы түрде таңдауға көмектесіп, еңбек нарығының талаптары мен кәсіби даму мүмкіндіктері туралы түсінігін кеңейтуге бағытталған.
Кезекті ақпараттық кездесулер №43, №109, №91, №111 М.Мәметова атындағы және №35 М.Мәметова атындағы жалпы орта білім беретін мектептердің жоғары сынып оқушыларымен өтті. Іс-шара барысында мектеп түлектеріне мамандық таңдауда ескерілетін негізгі факторлар мен кәсіби мақсат қоюдың маңызы түсіндірілді.
Жиын барысында спикер қазіргі еңбек нарығындағы негізгі үрдістерге тоқталып, алдағы уақытта сұранысқа ие болуы мүмкін мамандықтар мен біліктілік түрлері туралы ақпарат берді. Сонымен қатар технологиялардың дамуы, еңбек салаларындағы өзгерістер және жаңа дағдыларды меңгерудің қажеттілігі сөз болды. Оқушыларға кәсіби бағытты таңдағанда өз қызығушылығы мен қабілетін, жеке қасиеттерін және болашақтағы мүмкіндіктерін қатар ескеру ұсынылды.
Кездесу барысында мамандық таңдаудың бір реттік шешім ғана емес, адамның болашақ өміріне ықпал ететін маңызды қадам екені атап өтілді. Осыған байланысты оқушыларға өздерінің күшті тұстарын анықтау, алға нақты мақсаттар қою, білімін үнемі жетілдіру және тәжірибелік дағдыларын дамыту жөнінде кеңестер берілді. Сондай-ақ еңбек нарығындағы өзгерістерге бейімделу, жаңа білімді меңгеруге дайын болу және жауапкершілік таныту кәсіби дамудың маңызды шарттары ретінде түсіндірілді.
Ақпараттық сағаттар барысында оқушылар өздерін қызықтырған сұрақтарын қойып, болашақ мамандықтарына қатысты пайдалы мәліметтер алды. Мұндай кездесулер жас түлектердің кәсіби бағдарын айқындап, оқу бағытын дұрыс таңдауына және еңбек жолына алдын ала дайындалуына мүмкіндік береді.
«Жастар ресурстық орталығы» жүзеге асырып жатқан жоба аясындағы жұмыстар жастардың кәсіби сауаттылығын арттыруға, еңбекке деген ынтасын қалыптастыруға және олардың болашаққа сенімді қадам жасауына бағытталған.
