ADYM.KZ / 2026 жылғы 1 маусымнан бастап Қазақстанда жылжымайтын мүлікке қатысты бірқатар мемлекеттік қызмет толықтай онлайн форматқа көшіріледі. Енді тұрғын үйдің техникалық паспорты мен кадастрлық паспорттың телнұсқасын алу үшін ХҚКО-ға барудың қажеті болмайды. Бұл туралы ҚР Жасанды интеллект және цифрлық даму министрлігі мәлімдеді.
Министрлік дерегінше, eGov.kz порталындағы «Жылжымайтын мүлік объектілеріне техникалық паспорт беру» және «Кадастрлық паспорттың телнұсқасын беру» қызметтері жаңартылған. Азаматтар енді өтінімді онлайн жолдап, мемлекеттік баж салығын бірден төлеп, дайын құжатты электронды форматта ала алады.
Бұған дейін бұл қызметтерді алу үшін тұрғындар ХҚКО-ға барып, төлем жасап, кейін дайын құжатты қайтадан сол жерден алуға мәжбүр еді. Енді барлық процесс цифрлық форматта жүзеге асады.
Дайын техникалық немесе кадастрлық құжат eGov.kz порталындағы Жеке кабинеттегі «Қызметтерді алу тарихы» бөліміне автоматты түрде жіберіледі. Қызмет көрсету мерзімі жылжымайтын мүлік нысанының санатына байланысты анықталады.
Қызметті пайдалану үшін азаматтар eGov.kz порталына кіріп, қажетті қызмет түрін таңдап, өтінім нысанын толтырып, мүлік санатын көрсетіп, төлем жасап, сұранымды электронды цифрлық қолтаңбамен растауы тиіс.
Министрліктің мәліметінше, цифрлық қызметтерге сұраныс жыл сайын артып келеді. Мәселен, 2021 жылы техникалық және кадастрлық құжаттарды онлайн рәсімдеуге 100 мың өтінім түссе, бұл барлық өтінімнің 22,8 пайызын құраған. Ал 2025 жылы онлайн өтінімдердің үлесі 41 пайызға дейін жеткен.
ҚР Жасанды интеллект және цифрлық даму бірінші вице-министрі Ростислав Коняшкиннің айтуынша, 1 маусымнан бастап аталған қызметтер бойынша ХҚКО операторлары арқылы өтінім қабылдау тоқтатылады.
Сондай-ақ техникалық паспорт алу қызметі eGov mobile қосымшасында да қолжетімді болады.
Министрлік өкілдерінің айтуынша, мемлекеттік қызметтерді кезең-кезеңімен онлайн форматқа көшіру ХҚКО-ларға түсетін жүктемені азайтып, азаматтардың уақытын үнемдеуге мүмкіндік береді.
Ал онлайн қызметті өздігінен пайдалана алмайтын азаматтар үшін ХҚКО-дағы өзіне-өзі қызмет көрсету аймақтары жұмысын жалғастырады.
Қазіргі таңда Қазақстанда ЭЦҚ рәсімдеу, тұрғылықты жер бойынша тіркелу, жүргізуші куәлігін ауыстыру, автокөлікті бастапқы тіркеу, еңбек мигранттарына рұқсат беру және жер телімдеріне құжат рәсімдеу сияқты бірқатар мемлекеттік қызметтер де онлайн форматта қолжетімді.
