Шымкент қаласындағы «Жұлдыз» индустриалды аймағында өнеркәсіптік кәсіпорындарға қызмет көрсетуге арналған тұйықталған теміржол желісінің құрылысы аяқталды. Қала әкімі Ғабит Сыздықбеков атқарылған жұмыстардың нәтижесімен танысып, жаңа инфрақұрылымның мүмкіндіктерін көрді, деп хабарлайды Adym.kz ақпараттық сайты қала әкімінің баспасөз қызметіне сілтеме жасап.
Теміржол желісінің жалпы ұзындығы 6,4 шақырымды құрайды. Құрылыс барысында теміржол төсемі төселіп, қажетті инфрақұрылым жұмыстары жүргізілді. Сонымен қатар, құрылыс жұмыстары кезінде бүлінген жол учаскелерінің асфальт жабыны толық қалпына келтірілді.
Жаңа теміржол желісі индустриалды аймақта орналасқан кәсіпорындардың жүк тасымалдау мүмкіндігін арттыруға бағытталған. Бұған дейін жүктерді жеткізу мен дайын өнімді жөнелту кезінде туындаған логистикалық кедергілерді азайтуға мүмкіндік береді. Енді кәсіпорындар шикізат пен өндірістік материалдарды теміржол арқылы тікелей жеткізіп, дайын өнімдерін белгіленген бағыттарға жөнелте алады.
Бұл өз кезегінде тасымалдау уақытын қысқартуға, логистикалық шығындарды оңтайландыруға және өндірістік процестердің үздіксіздігін қамтамасыз етуге ықпал етеді. Сондай-ақ кәсіпорындардың өнім өткізу нарықтарына шығу мүмкіндігін кеңейтіп, өндіріс көлемін ұлғайтуға қолайлы жағдай қалыптастырады.
Еске сала кетейік, Қазақстан халқына Жолдауында Мемлекет басшысы Қасым-Жомарт Тоқаев көлік-логистика инфрақұрылымын дамытудың, теміржол желісін кеңейтудің және жүк тасымалының тиімділігін арттырудың маңыздылығын атап өткен болатын. «Жұлдыз» индустриалды аймағында теміржол желісінің іске қосылуы осы міндеттерді өңірлік деңгейде жүзеге асыруға бағытталған нақты қадамдардың бірі.
Жаңа инфрақұрылым индустриалды аймақтың инвестициялық тартымдылығын арттырып, әлеуетті инвесторлар үшін қосымша мүмкіндік ашады. Бұл өз кезегінде жаңа өндіріс орындарын орналастыруға, кәсіпорындардың жұмысын кеңейтуге және қосымша жұмыс орындарын құруға ықпал етеді.
Жалпы, теміржол желісінің құрылысы «Жұлдыз» индустриалды аймағының өндірістік және логистикалық әлеуетін арттырып, Шымкент қаласының өнеркәсіптік дамуына серпін беретін маңызды инфрақұрылымдық жоба болып табылады.
