ADYM.KZ / «Таза Қазақстан» республикалық акциясы аясында жастар арасында экологиялық мәдениетті қалыптастыруға бағытталған «Қалдықсыз қала» тақырыбында кездесу өтті.
Іс-шараның негізгі мақсаты – жастардың қоршаған ортаны қорғауға деген жауапкершілігін арттыру, тұрмыстық қалдықтарды дұрыс басқарудың маңызын түсіндіру және қоршаған ортаға ұқыпты қарау мәдениетін қалыптастыру. Кездесу барысында экологиялық мәселелердің алдын алу, тазалықты сақтау және қалдықтарды басқару саласындағы талаптарды орындау жөнінде ақпарат берілді.
Кездесуге Қазақстан Республикасы Ішкі істер министрлігі Шымкент қаласының Полиция департаменті, Шымкент қаласы прокуратурасы және Экология департаментінің өкілдері қатысып, жастармен пікір алмасты. Сала мамандары экологиялық талаптар мен қолданыстағы заң нормалары бойынша түсіндірме жұмыстарын жүргізіп, қоршаған ортаны қорғауға қатысты негізгі міндеттерге тоқталды.
Экология департаментінің өкілдері тұрмыстық қалдықтарды бейберекет тастау, арнайы белгіленбеген орындарға қоқыс шығару және табиғи аумақтардың ластануы қоршаған ортаға кері әсер ететінін атап өтті. Сонымен қатар қалдықтарды белгіленген орындарға тастау, тазалық талаптарын сақтау және экологиялық жауапкершілікті күшейту қажеттігі түсіндірілді.
Кездесу барысында қалдықтарды сұрыптау және қайта өңдеуге жіберу мәселесіне де назар аударылды. Қалдықтарды түріне қарай бөлу арқылы олардың бір бөлігін қайта өңдеуге мүмкіндік бар екені айтылып, жастардың күнделікті тұрмыста қарапайым экологиялық әдеттерді қалыптастыруы маңызды екені түсіндірілді.
Полиция департаментінің өкілдері қоғамдық орындардағы тәртіп пен тазалықты сақтау мәселелеріне тоқталып, құқық бұзушылықтардың алдын алу бағытында жүргізіліп жатқан жұмыстар туралы ақпарат берді. Жастарға қоғамдық орындарға ұқыпты қарау, белгіленбеген жерлерге қоқыс тастамау және ортақ кеңістікті таза ұстау әр азаматтың жауапкершілігі екені айтылды.
Ал прокуратура өкілдері экологиялық қауіпсіздікті қамтамасыз етудің құқықтық негіздеріне тоқталып, заң талаптарын сақтау мен құқықтық сауаттылықтың маңызын атап өтті. Қатысушылар өздерін қызықтырған сұрақтарын қойып, мамандардан нақты жауаптар алды.
Кездесуде қоршаған ортаны қорғау тек мемлекеттік органдардың немесе арнайы ұйымдардың міндеті емес, қоғамның әр мүшесіне ортақ жауапкершілік екені атап өтілді. Осы ретте жастардың экологиялық бастамаларға белсенді қатысуы, қоғамдық орындардағы тазалықты сақтауы және айналасындағыларға үлгі болуының маңызы айтылды.
«Таза Қазақстан» акциясы аясындағы мұндай кездесулер жастардың экологиялық сауаттылығын арттырып, табиғи ресурстарға ұқыпты қарау және қоршаған ортаны қорғау мәдениетін қалыптастыруға бағытталған. Тазалық пен қоршаған ортаға жауапкершілікпен қарау – қаланың жайлылығы мен өмір сүру сапасын арттырудың маңызды шарттарының бірі.
Іс-шара соңында жастарға экологиялық мәдениетті күнделікті өмір салтына айналдыру, тазалықты сақтауға үлес қосу және қоршаған ортаны қорғауға бағытталған қоғамдық бастамаларға белсенді қатысу жөнінде ұсыныстар берілді.
