ADYM.KZ / Шымкент қаласы жастар саясаты басқармасының «Жастар ресурстық орталығы» КММ-нің ұйымдастыруымен «NEET санатындағы жастарды қолдау және жұмыссыздықты азайту: кәсіби бағдар беру және еңбек нарығына бейімдеу» жобасы бастау алды.
Жоба NEET санатындағы жастардың кәсіби бағыт-бағдарын айқындауға, олардың еңбек нарығы туралы түсінігін кеңейтуге және болашақ мамандығын саналы түрде таңдауына қолдау көрсетуге бағытталған. Сонымен қатар жастардың өз қабілеті мен қызығушылығын анықтап, алған білімін еңбек нарығының сұранысымен ұштастыруына мүмкіндік беру көзделген.
Жоба аясында №130, №85, №145 және №62 жалпы білім беретін мектептерінде ақпараттық-түсіндіру іс-шаралары ұйымдастырылып, жастармен кездесулер өткізілді. Іс-шара барысында қатысушыларға мамандық таңдаудың жауапкершілігі, кәсіби дамудың маңызы және еңбек нарығындағы өзгерістерге бейімделу жолдары жөнінде кең көлемде ақпарат берілді.
Кездесу барысында профориентолог Сая Дәулетқызы Сихым жастарға мамандық таңдаудың негізгі қырларын түсіндіріп, кәсіби бағытты анықтау кезінде жеке қабілет, қызығушылық, бейімділік пен мақсатты ескеру қажеттігіне тоқталды. Сондай-ақ еңбек нарығында сұранысқа ие мамандықтар туралы ақпарат беріліп, қазіргі таңда кәсіби білім мен практикалық дағдыларды қатар дамыту маңызды екені айтылды.
Мамандық таңдауда тек бір кәсіптің танымалдығына немесе айналаның пікіріне сүйенбей, адамның өз мүмкіндігін дұрыс бағалауы маңызды. Осы ретте жастарға өздерінің күшті тұстарын анықтап, қандай салада нәтижелі жұмыс істей алатынын саралау ұсынылды. Кәсіби бағдар беру барысында мамандықтың болашағы, еңбек жағдайы, біліктілік талаптары және одан әрі кәсіби өсу мүмкіндіктері де назарға алынды.
Кездесуде еңбек нарығындағы жаңа бағыттар мен заманауи кәсіптердің қалыптасуы жөнінде де түсінік берілді. Цифрлық технологиялардың дамуы, жаңа өндірістік үдерістер мен қызмет көрсету саласындағы өзгерістер бірқатар жаңа мамандықтарға сұраныстың артуына ықпал етіп отырғаны атап өтілді. Сондықтан жастарға өз білімін үнемі жетілдіріп, жаңа дағдыларды меңгеруге және кәсіби дамуға дайын болудың маңызы түсіндірілді.
Іс-шара барысында қатысушылар өздерін қызықтырған сұрақтарын қойып, мамандық таңдау, білім алу бағыты және еңбек нарығына бейімделу мәселелері бойынша маманнан кеңес алды.
Жоба аясындағы жұмыстар жастардың кәсіби мүмкіндіктері туралы ақпараттануын арттырып қана қоймай, олардың болашаққа нақты жоспар құруына, еңбекке деген жауапкершілігін қалыптастыруға және қоғамдағы белсенділігін арттыруға бағытталған. Кәсіби бағдар беру жұмыстарының жүйелі жүргізілуі жастардың өз қабілетін тиімді пайдаланып, еңбек нарығында өз орнын табуына ықпал етпек.
