ADYM.KZ / Астанада Respublica партиясының кезектен тыс V съезі өтіп, партияның алдағы қызметіне қатысты маңызды шешімдер қабылданды.
Съездің басты қорытындысы – партия төрағасы Айдарбек Қожаназаровтың өкілеттік мерзімінің тағы үш жылға ұзартылуы болды. Осылайша, партия басшылығы өз жұмысын бұрынғы құрамда жалғастыратын болды.
Партияның тең төрағасы Сырымбек Тау республикалық делегаттарға Айдарбек Қожаназаровтың кандидатурасын ұсынып, оның өкілеттігін ұзарту туралы бастама көтерді. Ұсынысты съезге қатысқан 591 делегаттың басым көпшілігі қолдап, тиісті шешім қабылданды.
Жиын барысында өңірлік филиалдардың өкілдері сөз сөйлеп, Айдарбек Қожаназаровтың партияның қалыптасуы мен дамуына қосқан үлесін ерекше атап өтті. Олардың айтуынша, соңғы үш жыл ішінде Respublica еліміздің барлық өңірінде филиалдық желісін қалыптастырып, кадрлық резерв құрды, Парламентте өкілдікке ие болды. Сонымен қатар партияның бастамасымен бірқатар заңнамалық өзгерістер мен қоғамдық жобалар жүзеге асырылғаны айтылды.
Съезд қорытындысы бойынша делегаттар партияның қазіргі бағытын қолдап, ұйымның алдағы кезеңдегі жұмысын жалғастыруға сенім білдірді.
