ADYM.KZ / Шымкент қаласындағы «Мирас» колледжінде жастарға әскери қызметтің маңызын түсіндіру, азаматтық жауапкершілікті арттыру және Отан алдындағы борышты өтеудің мәнін насихаттау мақсатында «Жас сарбаз – ел болашағы» тақырыбында тағылымды кездесу өтті.
Іс-шараға «Жас сарбаз» республикалық қоғамдық бірлестігінің Шымкент қалалық филиалының төрағасы Сәбит Еркін Бауыржанұлы арнайы қатысып, колледж жастарына әскери қызметтің ерекшеліктері мен оның қоғамдағы маңызы жөнінде кеңінен айтып берді.
Кездесудің басты мақсаты – өскелең ұрпақтың бойында елге деген жауапкершілік сезімін қалыптастырып, әскери қызметтің тек міндет қана емес, азамат үшін үлкен жауапкершілік пен абырой екенін түсіндіру.
Іс-шара барысында әскери қызметтің мемлекет қауіпсіздігін қамтамасыз етудегі орнына тоқталды. Отанды қорғау, елдің тыныштығы мен тәуелсіздігін сақтау – кез келген мемлекеттің тұрақты дамуы үшін маңызды міндет екені атап өтілді.
Сондай-ақ әскери ортада тәртіп пен жауапкершіліктің ерекше маңызға ие екені айтылды. Әскери қызмет барысында адам белгіленген тәртіпті сақтауға, тапсырманы уақытылы әрі сапалы орындауға, ұжыммен жұмыс істеуге және кез келген жағдайда жауапты шешім қабылдауға үйренеді.
Спикер жастарға әскери қызметтің адам бойындағы төзімділік, жинақылық, батылдық және табандылық секілді қасиеттерді дамытудағы рөлі туралы айтып берді. Әскери тәртіптің жастардың өмірлік ұстанымдарын қалыптастыруға және өзіне жүктелген міндетке жауапкершілікпен қарауына ықпал ететіні түсіндірілді.
Кездесуде патриотизм ұғымына да ерекше мән берілді. Отанға деген сүйіспеншілік туған жерді құрметтеуден, елдің заңдарын сақтаудан, қоғамға пайдалы болуға ұмтылудан және өз міндетін адал атқарудан көрінетіні айтылды.
Сонымен қатар жастар әскери қызметке дайындық, мерзімді әскери қызметтің ерекшеліктері және әскери ортадағы күнделікті тәртіпке қатысты өздерін қызықтырған сұрақтарын қойды. Сәбит Еркін Бауыржанұлы жастардың сұрақтарына жауап беріп, әскери қызметке қатысты пайдалы ақпараттарымен бөлісті.
Кездесу барысында елдің бейбіт өмірі мен қоғамдық тұрақтылығын қамтамасыз етуде Отан қорғаушылардың еңбегі ерекше екені атап өтілді. Әскери қызметшілердің кәсіби даярлығы, тәртібі мен жауапкершілігі ел қауіпсіздігін қамтамасыз етудің маңызды құрамдас бөлігі екені түсіндірілді.
Мұндай кездесулер жастардың әскери қызмет туралы түсінігін кеңейтіп қана қоймай, олардың азаматтық ұстанымын нығайтуға, жауапкершілік пен тәртіптің маңызын түсінуге мүмкіндік береді.
Іс-шара соңында жастар Отанға қызмет ету – ел алдындағы жауапкершілікті сезінудің, азаматтық борышты адал орындаудың және қоғамның қауіпсіздігіне үлес қосудың маңызды жолдарының бірі екенін атап өтті.
