ADYM.KZ / Отбасы күніне орай Шымкент қаласының Орталықтандырылған балалар кітапханалары жүйесіне қарасты №14 бөлімде «Отбасылық құндылықтар және ұлттық тәрбие» тақырыбында дөңгелек үстел өтті.
Іс-шараның мақсаты – отбасындағы өзара сыйластықты нығайту, ата-ана мен бала арасындағы қарым-қатынасты жақсарту және ұлттық салт-дәстүрді дәріптеу. Кездесуде үлкенді құрметтеу, кішіге қамқор болу, отбасылық дәстүрлерді сақтау және ұлттық құндылықтарды кейінгі ұрпаққа жеткізу мәселелері сөз болды.
Дөңгелек үстелге Отбасын қолдау орталығы бөлімінің басшысы Лайла Әуелбек, Арипбаевтар, Мауленовтер, Жүзбаевтар, Нишамбаевтар және Сабитовтар әулеттерінің өкілдері, сондай-ақ кітапхана оқырмандары қатысты.
Кездесу барысында кітапханашы Сабина Алдабергенова «Отбасындағы ұлттық тәрбие» тақырыбында баяндама жасап, бала бойында туған халқының тарихы мен мәдениетіне, ана тіліне және рухани құндылықтарына құрмет қалыптастырудағы ата-ананың рөліне тоқталды.
«Ұлттық тәрбие ең алдымен отбасынан басталады. Бала үлкенді сыйлауды, кішіге қамқор болуды, ана тілі мен ұлттық мәдениеттің қадірін түсінуді ең алдымен үйде үйренеді. Бұл құндылықтар ұрпақтан-ұрпаққа жалғасқанда ғана тәрбиенің берік негізі қалыптасады», – деді Сабина Алдабергенова.
Іс-шара аясында ата-аналар мен балалардың өзара қарым-қатынасын нығайтуға бағытталған «Отбасылық құндылықтар» және «Бірге шешейік» шығармашылық алаңдары ұйымдастырылды. Қатысушылар түрлі отбасылық жағдайларды талқылап, мәселелерді бірлесіп шешудің жолдарын қарастырды.
Сонымен қатар психологпен бірге «Жылы сөздер» тренингтік ойыны өткізілді. Қатысушылар бір-біріне алғыс айтып, қолдау сөздерін білдіріп, өзара сенім мен түсіністікті арттыруға бағытталған жаттығуларға қатысты.
Кітапханашы Ақбөпе Тұлтаева отбасының бала тәрбиесіндегі орнына тоқталып, ата-ананың жеке үлгісінің маңызын атап өтті.
«Отбасы – бала өмірлік бағдар алатын алғашқы орта. Балаларға мейірімділік, сыйластық пен жауапкершілікті сөзбен түсіндірумен қатар, оны күнделікті ісімізбен көрсету маңызды. Осындай кездесулер ата-ана мен баланың ашық сөйлесіп, бір-бірін тыңдауына мүмкіндік береді», – деді Ақбөпе Тұлтаева.
Кездесу соңында «Отбасы – тәрбиенің алтын бесігі» атты кітап көрмесі таныстырылды. Көрмеге бала тәрбиесі, отбасылық қарым-қатынас және рухани-адамгершілік құндылықтарға арналған әдебиеттер қойылды.
Шараға қатысушылар отбасы дәстүрлерін сақтау, ұрпақтар сабақтастығын нығайту және ұлттық құндылықтарды жас ұрпақтың бойына сіңіру – берік әрі үйлесімді қоғам қалыптастырудың маңызды негізі екенін атап өтті.
