ADYM.KZ / Марокконың Марракеш қаласында Қазақстан Республикасының Құрметті консулдығының ресми ашылу рәсімі өтті. Салтанатты іс-шараға Қазақстанның Мароккодағы Төтенше және өкілетті елшісі Сәулекүл Сайлауқызы қатысты.
Қазақстан Республикасы Сыртқы істер министрлігінің мәліметінше, рәсімге Марракеш қаласының жергілікті билік өкілдері, Марокко Парламентінің депутаттары, халықаралық ұйымдар, мемлекеттік органдар мен ұлттық компаниялардың, сондай-ақ Қазақстан мен Марокконың сауда-өнеркәсіп палаталары және іскер әйелдер қауымдастықтарының өкілдері қатысты.
Елші Сәулекүл Сайлауқызы Құрметті консулдардың екі ел арасындағы ынтымақтастықты дамытудағы рөліне тоқталып, олардың жергілікті жағдайды жақсы білетіндігінің арқасында сауда-экономикалық байланыстарды нығайтуға, туристерге қолдау көрсетуге және түрлі мәселелерді жедел шешуге ықпал ететінін атап өтті.
Сондай-ақ ол Марракештің кездейсоқ таңдалмағанын айтты. Оның сөзінше, қала Марокконың ірі туристік әрі іскерлік орталықтарының бірі саналады. Бұған қоса, өткен жылдан бері күшіне енген визасыз режим Қазақстан мен Марокко азаматтарының өзара сапарларының артуына оң әсер еткен.
Марракештегі Қазақстанның жаңадан тағайындалған Құрметті консулы Юсеф Эсаси көрсетілген сенім үшін алғыс айтып, алдағы уақытта екі ел арасындағы сауда, инвестиция және іскерлік байланыстарды дамытуға күш салатынын мәлімдеді.
Айта кетейік, Марракештегі Құрметті консулдық – Қазақстанның Мароккодағы Касабланкадан кейін ашылған екінші консулдық мекемесі.
Еске салайық, бұған дейін Касабланкада Қазақстан–Марокко іскерлік кеңесінің алғашқы отырысы өткен болатын. Сондай-ақ Рабатта ауыл шаруашылығы, өнеркәсіп, сауда және инвестиция салаларындағы екіжақты ынтымақтастықты дамытуға арналған бірқатар кездесу ұйымдастырылды.
