ADYM.KZ / Астанада ағза трансплантациясы, трансплантолог дәрігерлердің еңбегі және донорлықты күтіп жүрген адамдардың тағдыры туралы баяндайтын «Хабар» агенттігінің «4739» деректі фильмінің тұсаукесері өтті.
Премьераға ҚР Премьер-министрінің орынбасары – Мәдениет және ақпарат министрі Аида Балаева, Денсаулық сақтау министрі Ақмарал Әлназарова, медицина саласының мамандары, ғалымдар, қоғам қайраткерлері, реципиенттер мен олардың отбасы мүшелері, сондай-ақ фильмнің авторлары мен кейіпкерлері қатысты.
Іс-шара барысында Аида Балаева Мемлекет басшысы Қасым-Жомарт Тоқаев ұлт денсаулығын елдің басты құндылықтарының бірі ретінде үнемі атап өтетінін айтты. Оның сөзінше, Қазақстанда ағза трансплантациясы жүйелі түрде дамып келеді, ал отандық дәрігерлер жоғары технологиялық әрі күрделі операцияларды сәтті орындауда.
Вице-премьердің айтуынша, Үкімет трансплантация жүйесін жетілдіруге, медициналық ұйымдардың кәсіби әлеуетін арттыруға және халық арасында түсіндіру жұмыстарын күшейтуге басымдық беріп отыр.
Фильм атауының да өзіндік мәні бар. Қазіргі таңда Қазақстанда 4 739 адам ағза трансплантациясын күту тізімінде тұр. Олардың көпшілігі үшін бұл – өмірін сақтап қалудың жалғыз мүмкіндігі. Алайда жыл сайын 350-ден астам науқас қажетті операцияны күтпей көз жұмады.
Ресми мәліметке сәйкес, елімізде жасалатын трансплантациялардың шамамен 90 пайызы тірі туыстық донорлардың қатысуымен жүзеге асады. Ал қайтыс болғаннан кейінгі донорлықтың үлесі 10 пайызға да жетпейді.
Соңғы бес жылда Қазақстанда 1 500-ге жуық ағза трансплантациясы жасалған. Оның әрбір төртіншісі 2025 жылға тиесілі. Былтыр ғана бүйрек, бауыр, жүрек және өкпе ауыстыру бойынша 310 операция орындалған.
Биыл елімізде алғаш рет балаға жүрек трансплантациясы сәтті жасалып, балалар трансплантологиясын дамытудағы маңызды кезеңдердің бірі болды.
Қазіргі уақытта электрондық үкімет порталы арқылы қайтыс болғаннан кейінгі донорлыққа қатысты өз ұстанымын 172 283 адам білдірген. Оның ішінде 16 109 азамат келісім берсе, 156 174 адам донорлықтан бас тартқан.
Деректі фильмді 24KZ телеарнасының журналисі Назерке Тоқжан мен режиссер Берік Шаров түсірген. Туынды пациенттердің, олардың жақындарының және дәрігерлердің өмірінен алынған шынайы оқиғалар арқылы адам өмірінің құндылығы, донорлық мәдениеті мен дер кезінде қабылданатын шешімнің маңызын көрсетеді.
«4739» деректі фильмі 24 шілде күні сағат 19:30-да 24KZ телеарнасынан көрсетіледі.
