ADYM.KZ / Қазіргі қоғамның өзекті мәселелерінің бірі – синтетикалық есірткілердің таралуы және олардың жастар денсаулығы мен қауіпсіздігіне төндіретін қаупі. Осыған байланысты Шымкент қаласында есірткіге тәуелділіктің алдын алу, заңсыз есірткі айналымына қарсы күрес және жастардың құқықтық сауаттылығын арттыру мақсатында «StopNarko» және «Есірткіге жол жоқ!» атты профилактикалық акциялар тұрақты түрде ұйымдастырылуда.
Құқық қорғау органдарының мәліметінше, есірткі заттарын таратуға байланысты заңсыз әрекеттерге жастардың тартылуы алаңдаушылық туғызады. Атап айтқанда, есірткі сатуды жарнамалау, ғимараттар мен қоғамдық орындардың қабырғаларына есірткі ресурстарының байланыс деректерін жазу, сондай-ақ «жасырын қойма» арқылы тарату сияқты әрекеттерге қатысатын жас азаматтар кездеседі. Кейбірі мұндай іске оңай табыс табудың жолы ретінде қараса, оның заңдық салдарын толық түсіне бермейді.
Осыған орай, қала мектептері мен жоғары оқу орындарында ақпараттық-түсіндіру жұмыстары күшейтілді. Кездесулер барысында жастарға есірткі заттарының адам ағзасына тигізетін зияны, тәуелділіктің психологиялық және әлеуметтік салдары, сондай-ақ есірткіні сақтау мен тарату үшін көзделген қылмыстық жауапкершілік туралы мәліметтер беріледі.
Нарколог-дәрігер Қайрат Исаев есірткіге тәуелділіктің алдын алуда ерте профилактика мен отбасылық тәрбиенің маңызына тоқталды.
«Нашақорлық пен есірткі бизнесі – қоғамның болашағына қауіп төндіретін күрделі мәселе. Әсіресе синтетикалық есірткілер адамның денсаулығына ауыр зиян келтіріп, психикасы мен жүйке жүйесіне кері әсер етуі мүмкін. Жастардың жеңіл табысқа немесе қызығушылыққа еріп, мұндай әрекеттерге бармауы үшін есірткінің зардабы мен заң алдындағы жауапкершілік туралы ашық түсіндіру қажет. Отбасындағы тәрбие, спорт пен өнерге баулу – алдын алу жұмыстарының маңызды бөлігі», – деді дәрігер.
Профилактикалық іс-шаралар аясында жастар арасында салауатты өмір салтын ұстану насихатталып, спорттық жарыстар мен танымдық кездесулер ұйымдастырылуда. Мұндай бастамалар жасөспірімдердің бос уақытын тиімді өткізуіне, пайдалы әдеттер қалыптастыруына және зиянды әрекеттерден аулақ болуына ықпал етеді.
Есірткі қылмысының алдын алу – құқық қорғау органдарының ғана емес, бүкіл қоғамның ортақ міндеті. Осы бағыттағы жұмыстар алдағы уақытта да жалғасып, жастардың денсаулығын қорғауға және қауіпсіз орта қалыптастыруға басымдық берілмек.
