ADYM.KZ / Қазақстанда жасанды интеллект саласындағы зерттеу бағытындағы жаңа жоғары оқу орны – Қазақстандық зерттеу ЖИ университеті (Qazaq AI Research University) ашылады. Бұл туралы Премьер-министрдің орынбасары – Жасанды интеллект және цифрлық даму министрі Жаслан Мәдиев Үкімет отырысында мәлімдеді.
Министрдің айтуынша, Мемлекет басшысы цифрлық трансформация мен жасанды интеллектіні Қазақстан дамуының негізгі стратегиялық басымдықтарының бірі ретінде айқындаған. Осы бағытта елде ауқымды институционалдық және заңнамалық реформалар жүзеге асырылып жатыр.
«Соңғы алты айда Қазақстанның цифрлық болашағына арналған реттеушілік және институционалдық негіз жедел қалыптастырылды. Азаматтардың цифрлық құқықтары, соның ішінде дербес деректерді қорғау құқығы конституциялық деңгейде бекітілді», – деді Жаслан Мәдиев.
Сондай-ақ ол Alatau City-ге ерекше құқықтық мәртебе берілгенін атап өтіп, цифрлық даму саласын реттейтін бірқатар маңызды заңдар қабылданғанын жеткізді. Олардың қатарында Цифрлық кодекс, «Жасанды интеллект туралы» заң, «Цифрлық активтер туралы» заң және «Киберқауіпсіздік туралы» заң бар. Бұдан бөлек, телекоммуникациялар нарығын дамыту және деректерді өңдеу орталықтарын кеңейтуге қатысты нормалар да енгізілген.
Министрдің айтуынша, елімізде жасанды интеллект саласы бойынша кадр даярлаудың үздіксіз жүйесі қалыптасуда. Атап айтқанда, 12–18 жас аралығындағы оқушыларға арналған TUMO креативті технологиялар орталығы жұмыс істейді. Ал ересектерге арналған Tomorrow School жобасы практикалық AI-мамандарды даярлауға бағытталған.
Осы жүйенің жалғасы ретінде биыл 1 қыркүйекте Қазақстандық зерттеу ЖИ университеті – Qazaq AI Research University ресми түрде іске қосылады. Жаңа оқу орны жасанды интеллект саласында ғылыми зерттеулер жүргізу мен жоғары білікті мамандар даярлауға бағытталмақ.
Жаслан Мәдиев сондай-ақ цифрлық инфрақұрылымның дамуы елдің цифрлық трансформациясының негізгі шарты екенін атап өтті.
Оның айтуынша, 2028 жылға қарай ауылдардың 92%-ы жоғары жылдамдықты интернетпен қамтылмақ. Қазіргі уақытта 20 ірі қалада 5G желісін дамыту жұмыстары жүргізіліп жатыр. Сонымен қатар ұзындығы 4 мың шақырымнан асатын талшықты-оптикалық байланыс желісінің гипермагистралі салынуда.
Бұдан бөлек, республикалық және облыстық маңызы бар 40 мың шақырым автожол байланыспен қамтамасыз етіледі. Ел аумағын толық қамту мақсатында спутниктік интернет жүйелері де енгізілуде.
