ADYM.KZ / Қазақстан құрамасы жасанды интеллект бойынша өткен алғашқы Орталық Еуропа олимпиадасында (EUROAI 2026) жоғары нәтиже көрсетіп, бір алтын, екі күміс және бір қола медаль жеңіп алды. Бұл туралы Қазақстанның Спорттық бағдарламалау федерациясының баспасөз қызметі хабарлады.
EUROAI – жасанды интеллект бағытындағы жыл сайынғы өңірлік олимпиада. Жарыс барысында қатысушылар машиналық оқыту (Machine Learning), терең оқыту (Deep Learning), табиғи тілді өңдеу (Natural Language Processing) және компьютерлік көру (Computer Vision) салалары бойынша практикалық тапсырмаларды жеке орындады.
Олимпиада 2026 жылғы 14–19 шілде аралығында Румынияның Клуж-Напока қаласындағы Бабеш–Бойяи университетінде өтті. Қазақстандық команда жарысқа онлайн форматта қатысып, Еуропаның жетекші құрамаларымен бақ сынасты.
Жарыс қорытындысында Әбу Қанабек алтын медаль иеленсе, Исламнур Хусаинов пен Даужан Бекетов күміс жүлдегер атанды. Ал Сұлтанби Исатай қола медаль жеңіп алды.
Екі күнге созылған сайыста қатысушылар жасанды интеллект модельдерін нөлден әзірлеп, бағдарламалау, деректерді талдау және машиналық оқыту салаларындағы күрделі практикалық тапсырмаларды орындады. Олимпиада форматы олардың теориялық білімін ғана емес, шектеулі уақыт ішінде тиімді шешім қабылдау қабілетін де сынады.
Қазақстанның Спорттық бағдарламалау федерациясының президенті Бағдат Мусин бұл нәтижені отандық жасанды интеллект мектебінің әлеуетін айқын көрсететін жетістік деп бағалады.
– Жас өрендеріміз EUROAI 2026 олимпиадасында табысты өнер көрсетіп, Қазақстанның жасанды интеллект пен спорттық бағдарламалау мектебі әлемдік деңгейде бәсекеге қабілетті екенін тағы бір мәрте дәлелдеді. Бұл – жас таланттарды жүйелі қолдаудың нәтижесі. Балаларымызды мақтан тұтамын, – деді Бағдат Мусин.
Айта кетейік, қазақстандық оқушылардың келесі халықаралық жарысы 2026 жылғы 2–8 тамыз аралығында Астанада өтетін Жасанды интеллект бойынша халықаралық олимпиада (IOAI) болмақ. Байрақты бәсекеге әлемнің 110 елінен 500-ге жуық оқушы қатысады деп жоспарланып отыр.
