ADYM.KZ / Әйелдер теннисі қауымдастығы (WTA) әйелдер арасындағы жарыстарға қатысатын спортшылар үшін биологиялық жынысты растауға арналған міндетті гендерлік тестілеуді енгізетінін мәлімдеді. Бұл туралы Al Jazeera хабарлады.
Жаңа талапқа сәйкес, спортшылар SRY генінің бар-жоғын анықтайтын тесті бір рет қана тапсырады. Тексеру ауыз қуысының жағындысын алу немесе қан талдауы арқылы жүргізіледі.
Егер тест нәтижесінде SRY гені анықталса, спортшы қосымша медициналық тексеруден өтеді. Бұл ген ағзаның ер адамға тән биологиялық дамуына жауап беретін негізгі көрсеткіштердің бірі саналады.
WTA өкілдерінің мәліметінше, жаңа талаптарды енгізу 2026 жылы басталады. Ұйым тестілеу барысында құпиялылық пен дербес деректерді қорғау талаптары толық сақталатынын, сондай-ақ спортшыларға жаңа саясат бойынша түсіндіру жұмыстары жүргізілетінін атап өтті.
– Бұл мәселенің күрделі әрі сезімтал екенін түсінеміз. Сондықтан жаңа саясат барлық спортшының ар-намысы мен қадір-қасиетін құрметтей отырып жүзеге асырылады, – деп мәлімдеді WTA өкілі.
Айта кетейік, WTA-ның 2024 жылы қабылданған ережесіне сәйкес, әйел гендерлік сәйкестігін мәлімдеген және жарыс басталғанға дейін кемінде екі жыл бойы тестостерон деңгейін белгіленген шектен төмен ұстап келген трансгендер әйелдерге жарыстарға қатысуға рұқсат берілген болатын.
Қазіргі уақытта WTA турнирлеріне қатысып жүрген трансгендер әйел спортшылар жоқ екені хабарланды.
Соңғы жылдары биологиялық жынысты анықтауға арналған осындай тестілеуді Дүниежүзілік жеңіл атлетика қауымдастығы (World Athletics) мен Дүниежүзілік бокс федерациясы (World Boxing) секілді бірқатар халықаралық спорт ұйымдары да енгізді.
Бұған дейін Халықаралық Олимпиада комитеті Олимпиада ойындарындағы әйелдер арасындағы жарыстарға биологиялық жынысы арнайы бір реттік тест арқылы расталған спортшылар ғана қатыстырылатынын мәлімдеген еді.
