Қазақстан Ұлттық банкі (ҚҰБ) айналымға енген жаңа үлгідегі 500 теңгелік банкноттың қорғаныш элементтерін жариялап, халыққа ақшаның түпнұсқалығын өз бетінше тексерудің қарапайым ережелерін еске салады. Бұл туралы Adym.kz ақпараттық сайты бас реттеушінің баспасөз қызметіне сілтеме жасап хабарлайды.
Естеріңізге сала кетейік, жаңа дизайндағы 500 теңгелік ақша белгісі 2025 жылғы 25 желтоқсанда ресми түрде қолданысқа енгізілген болатын.
Бұл ұлттық валютаның қорғанысы күшейтілген «Сақ стилі» сериясымен жарық көрген бесінші банкнот.
Жаңа серияның көркемдік негізі көшпенділер мәдениетінің бірегей болмысы мен дәстүрлі қазақ орнаментінің бастауын бейнелейтін элементтермен ерекшеленеді.
Ұлттық банк мамандары азаматтарға жалған ақшаның құрбаны болмау үшін «Ұстап көр, қарап көр, еңкіш тартып көр» әдісін қолдануды ұсынады.
Түпнұсқа банкнотты бірнеше секунд ішінде анықтауға көмектесетін негізгі қорғаныш белгілері мынадай:
Банкнотта жоғары рельефті қалыптастыратын арнайы баспа түрі алтын интаглио қолданылған. Қазақстан Республикасының Елтаңбасы алтын түстес металл бояудың анық сезілетін жоғары бедерлі қабатымен басылған.
Сондай-ақ банкноттың жиегінде көру қабілеті нашар адамдарға арналған, саусақ ұшымен оңай аңғарылатын арнайы рельефті белгілер бар.
Ақшаны жарыққа тосып қараған кезде, үзік-үзік пішіндегі монохромды қорғаныс жібі бір тұтас сызыққа айналады. Сонымен қатар жарық фонында номиналдың анық бейнесі электротип (су белгісі мен қорғаныс жібі) айқын көрінеді.
Банкноттың көлбеу бұрышын өзгерткен кезде, қорғаныс жібінен көгілдір түстің лүпілдеп тұратын динамикалық қозғалысын байқауға болады.
Ұлттық банк төлем жүйесіндегі қауіпсіздікті арттыру мақсатында 500 теңгелік банкноттың барлық қорғаныш элементтері көрсетілген арнайы ақпараттық видеороликті өзінің ресми YouTube арнасына жүктеді.
Сауда-саттық барысында күмәнді ақша белгілері кезіккен жағдайда, бірден құқық қорғау органдарына немесе Ұлттық банктің жақын маңдағы филиалына хабарласу қажеттігі ескертіледі.
