ADYM.KZ / Мегаполисте жастардың құқықтық сауаттылығын арттыру және құқық бұзушылықтардың ерте алдын алу бағытындағы жұмыстар жүйелі түрде жүргізіліп келеді. Қазіргі таңда Шымкентте 260 мыңнан астам жас өмір сүрсе, олардың қоғамдық тәртіпті сақтауы мен саналы көзқарас қалыптастыруы – басты назардағы мәселе.
Шымкент қаласы Полиция департаменті мен Жастар ресурстық орталығының мәліметінше, жыл басынан бері қала аумағында жасөспірімдер мен жастар арасындағы құқық бұзушылықтардың санын азайту мақсатында 50-ден астам ауқымды түсіндіру шаралары ұйымдастырылды. Арнайы рейдтер мен «Құқықтық тәртіп» жедел-профилактикалық іс-шаралары барысында колледж және университет студенттерімен кездесулер өткізіліп, вандализм, ұсақ бұзақылық және басқа да теріс әрекеттер үшін қарастырылған заңды жауапкершілік түсіндірілді.
Мәселенің өзектілігі мен қабылданып жатқан шаралар туралы Шымкент қалалық Жастар ресурстық орталығының басшысы Мадияр Құралбайұлы өз пікірімен бөлісті:
«Жастар арасындағы құқық бұзушылықтың алдын алу тек жазалау шараларымен шектелмеуі тиіс. Ең бастысы – түсіндіру жұмыстары арқылы құқықтық мәдениетті көтеру. Бүгінгі таңда жастардың бос уақытын тиімді ұйымдастыру үшін қалада спорт секциялары мен әртүрлі үйірмелердің қатары артып келеді. Заңды білмеу жауапкершіліктен босатпайтындықтан, әрбір жас өз әрекеті үшін саналы түрде жауап беруі тиіс».
Сонымен қатар, қоғам белсенділері мен заңгерлер де бұл бағытта ата-аналардың рөлі ерекше екенін атап өтеді. Заңгер-сарапшылардың пікірінше, кәмелетке толмағандардың қатысуымен болатын құқық бұзушылықтардың дені отбасындағы бақылаудың әлсіздігінен орын алады. Сондықтан мектептер мен жоғары оқу орындарында құқық қорғау органдарының қатысуымен ашық сағаттар мен тренингтерді тұрақты түрде өткізу өз нәтижесін беруде. Қала аумағындағы бұл профилактикалық жұмыстар алдағы уақытта да өз жалғасын тауып, жастардың құқықтық санасын қалыптастыруға негіз болмақ.
